''Fənərbaxça'' ilə 1-ci liqa təmsilçisi ''Gənclərbirliyi'' arasında neçə müddətdi Arda Gülərlə bağlı aparılan danışıqlar, nəhayət, uğurlu şəkildə yekunlaşıb.
Football-plus.az xəbər verir ki, bilindiyi kimi, Türkiyə futbolunun və ''Fənər''in yeni ulduzu olan Arda Gülər ''Gənclərbirliyi''nin yetirməsidi. 2005-ci ildə Ankarada doğulan istedadlı yarımmüdafiəçi 2014-dən etibarən paytaxt təmsilçisinin ''altyapısı''nda futbola başlayıb. İstanbul nəhəngi onu 2019-da, yəni 14 yaşında öz akademiyasına cəlb etmişdi. Həmin vaxt tərəflər arasındakı anlaşmaya görə Ardanın sonrakı satışından əldə olunacaq gəlirin 20 faizi ''Gənclər''ə çatmalıydı. Bəlkə də o vaxt ''sarı-lacivərdlilər'' bu şərtə o qədər də önəm verməmişdilər. Amma Ardanın gənc yaşda böyük populyarlıq qazanması və indidən bir çox Avropa klublarının diqqət mərkəzinə düşməsi vəziyyəti dəyişib. ''Fənər'' ''Gənclərbirliyi''nə çatacaq 20 faizlik payla bağlı anlaşmanın ləğv olunması üçün qarşı tərəfə 2,5 milyon avro ödəməyə razılıq verib! Bunu ''Gənclər''in prezidenti Niyazi Akyol da təsdiqləyib:

Türkiyə mətbuatının yazdığına inansaq, başqanın haqqında bəhs etdiyi 4 futbolçu Can Bartu, Utku Karakaya, Yiğit Evin və Mahmut Ceyhundu. Onların hamısı bundan sonra ''Fənər''in akademiyasında məşq edəcək. ''Gənclər''in qarşı tərəfdən icarəyə götürmək istədiyi futbolçu isə Maurisio Lemosdu. Superliqada adı onsuz da mövsümlük iştirak ərizəsinə salınmayan uruqvaylı müdafiəçi 1-ci liqa klubunda oynamağa razılıq versə, bu mövsüm üçün qalan 700 min avroluq maaşının hamısını ''Fənər'' ödəyəcək. Qeyd edək ki, 2020/21-də elita ilə vidalaşan və son dönəmlərdə transfer qadağası ilə üzləşən ''Gənclərbirliyi'' hazırda çətin günlər yaşayır. Komanda 1-ci liqada 16 oyuna topladığı 7 xalla 19-cu, yəni sonuncu pillədə qərarlaşıb. Buna baxmayaraq, rəhbərlik ankaralıların 1-ci liqada qalacağına inanır. “Fənərbaxça” ilə 2025-ci ilə qədər müqaviləsi olan Arda Gülərə gəlincə, o, cari mövsüm 13 rəsmi oyunda 3 qol, 1 məhsuldar ilə fərqlənib.