Xəbər verdiyimiz kimi, bu il MHL-in final seriyasında “Florida”nı məğlub edən (4:1) “Veqas” tarixində ilk dəfə Stenli kubokunu qazanıb.

"Football-plus.az" xəbər verir ki, bazar günü bu münasibətlə Las-Veqas küçərələrində çempionluq paradı keçirilib. Paradın marşrutu əsasən Las-Veqasın ən böyük küçəsi olan “Las-Veqas-Strip”i əhatə edib. MHL-in rəsmi saytının yaydığı xəbərə görə, tədbirdə 200 minə yaxın adam iştirak edib.

Final seriyası ilə bağlı başqa maraqlı xəbərlər də var. Seriyanın həlledici – 5-ci oyununu (“Veqas” həmin oyunda 9:3 hesabıyla qalib gəlib) 2,72 milyon tamaşaçı izləyib. Bu isə son 29 il ərzində Stenli kubokunun 5-ci oyunu üçün ən pis göstəricidi. 1994-cü ildə “Vankuver” – “Reyncers” oyununu bundan da az – 2,41 milyon tamaşaçı izləmişdi. Bu il Stenli kuboku uğrunda 5 oyunun hər birini orta hesabla 2,6 milyon tamaşaçı izləyib ki, bu da “Kolorada” ilə “Tampa-Bey” arasındakı ötənilki, 6 oyunluq seriya ilə müqayisədə 2 milyon azdı.

Bu arada Las-Veqas polisinin seriyanın 5-ci oyununda qətliam törətmək istəyən kişini həbs etməsi haqda xəbər yayılıb. Şübhəli şəxs oyundan əvvəl sosial şəbəkədə dəfələrlə atəş açacağı ilə bağlı təhdid yağdırıb. Polisin hesabatnda cinayətkar psixi pozğunluq və həbslərlə bağlı zəngin tarixçəsi olan 33 yaşlı kişi kimi xarakterizə olunur. O, hələ 2014-cü ildə məişət zorakılığında və adam izləməkdə ittiham olunub. 2022-ci ildə isə terror aktə və ya kütləvi qırğın ilə bağlı cinayət aktı törətmək ittihamı ilə saxlanılıb.