Türkiyə çempionatında dünən keçirilən 2 oyunla 2-ci tura yekun vuruldu.

Football-plus.az xəbər verir ki, ''Konyaspor''la ''İstanbul BŞ''nin dueli qolsuz başa çatdı. ''Fənərbaxça'' isə səfərdə oynamasına rəğmən ''Kasımpaşa''nı 6:0 hesabı ilə darmadağın etdi. Amma meydan sahiblərinin 16-cı dəqiqədən etibarən azlıqda oynadığını da bildirək. Qonaqlarda Enner Valensiya ilə Arda Gülər dubl etdisə, Coşua Kinq ilə Əmrə Mor ''Fənər''in heyətində qol hesabını açdı. Valensiya ardıcıl 3-cü superliqa oyununda dubl etməyi bacardı. O, son 15 ildə Teofanis Gekas və Ariza Makukuladan sonra bunu bacaran 3-cü futbolçu oldu. Arda Gülər isə son 15 ildə Türkiyə çempionatında 5 qol həddinə ən gənc yaşda (17 yaş 71 gün) çatan futbolçu oldu.

Beləliklə, ''Fənər'' mövsümün ilk qələbəsini darmadağınla qazandı. Xatırladaq ki, İstanbul nəhəngi ilk turda öz meydanında ''Ümraniyəspor''la bacara bilməmişdi (3:3). ''Kasımpaşa''ya gəlincə, ilk turda ''İstanbul BŞ''yə 0:4 hesabı ilə uduzan komanda Türkiyə çempionatının yeni antorekorduna imza atıb. Belə ki, indiyə qədər turnirin tarixində ilk 2 turun hər birində ən azı 4 fərqi ilə uduzan kollektiv olmamışdı! Bu nəticələrdən sonra baş məşqçi Sami Uğurlu istefa verməli olub. O, komandanı ötən ilin dekabrından çalışdırırdı.