Ötən həftə bu mövsüm 61-ci dəfə keçirilən Türkiyə kubokunda finalçılar bəlli oldu.

"Football-plus.az" xəbər verir ki, çərşənbə günü Kadıköydə “Fənərbaxça” “Sivasspor”u qəbul etdi. Xatırladaq ki, mayın 3-də Sivasda keçirilən ilk oyun qolsuz başa çatmışdı. Turnirin son qalibi statusunda olan Rza Çalımbayın komandası bu matça ciddi hazırlaşmışdı. Hətta ötən həftəsonu sivaslılar superliqada “Qalatasaray”la səfər oyununa tam heyətlə çıxmamış və bəzi əsas oyunçuları məhz bu matça saxlamışdı. Amma İstanbulda bu komanda güclü və motivasiyalı rəqibə yalnız bir hissə müqavimət göstərə bildi. Fasilə ərəfəsində Qradel qapıçı ilə təkbətək qaldığı epizodu boşa verməsəydi, bəlkə də sonluq başqa cür olardı. “Vurmayana vurarlar” prinsipi 2-ci hissədə özünü tam doğrultdu. Əvvəlcə Fərdi Kadıoğlu qapı önündə yaranan qarışıqlıq zamanı mükəmməl zərbə ilə yerli fanatları ayağa qaldırdı. Qoldan ruhlanaraq irəli atılan “Fənər” çox keçmədən fərqi artırdı. Valensiyanın ötürməsindən sonra fərqlənən Batşuayi mövsümdəki 18-ci qolunu vurdu. Yekun nəticəni isə Kinq müəyyənləşdirdi. Beləliklə, bu turnirlə çox da ulduzu barışmayan və onu cəmi 6 dəfə qazanan “Fənər” son 19 mövsümdə 9-cu, tarixində isə 18-ci dəfə finala yüksəldi. İstanbul nəhəngi sonuncu dəfə finalda 2018-də oynamış və “Akhisarspor”a 2:3 hesabı ilə boyun əymişdi. “Akhisarspor” hazırda 3-cü liqada, yəni 4-cü divizionda çıxış edir...

Digər finalçı cümə axşamı paytaxtda müəyyənləşdi. “Ankaragücü”nü evdə minimal hesabla məğlub edən “İstanbul BŞ” üçün cavab oyunu yaxşı başlamadı. Ankaralıların əsas qol silahı Əli Sou artıq 11-ci dəqiqədə ümumi nəticədə tarazlığı bərpa etdi. Qonaqlar yalnız 20-ci dəqiqədən sonra üstünlüyü ələ aldılar və 37-ci dəqiqədə Sərdar Gürlər adını tabloya yazdırdı. Bu nəticə qonaqları finala daşıyırdı. Amma müqavilə ilə “Panatinaikos”a məxsus olan yunanıstanlı legioner Tasos Xatzicovanis 90-cı dəqiqədə vurduğu qolla başakşəhərliləri şoka saldı. Bununla belə, əlavə vaxtda işlər meydan sahiblərinin istədiyi kimi getmədi. 97-ci dəqiqədə bosniyalı Nihad Muyakiç adi epizodda hakimə etiraza görə bir neçə saniyə ərzində iki sarı vərəqə alaraq komandasını pis vəziyyətdə qoydu. Tolunay Kafkasın komandası azlıqda rəqibin təzyiqinə tab gətirə bilmədi. 111-ci dəqiqədə seneqallı forvard Keni başla fərqlənərək yekun nəticəni müəyyənləşdirdi. “İstanbul BŞ” tarixində 2-ci dəfə kubokun finalına yüksəldi. Komanda daha öncə 2016/17-də “Konyaspor”la finalda qarşılaşmış və penalti seriyasında məğlub olmuşdu. Beləliklə, iyunun 11-də İzmirdəki “Gürsəl Aksel” stadionunda keçiriləcək finalda “Fənərbaxça” ilə “İstanbul BŞ” üz-üzə gələcək.

yarımfinal, cavab oyunları
Fənərbaxça – Sivasspor 3:0 (ilk oyun – 0:0)
Fərdi Kadıoğlu, 47. Batşuayi, 58. Kinq, 85.
Fənərbaxça: İrfan Can Eğribayat, Fərdi Kadıoğlu, Samet Akaydın, Salai, Peres, Arao (İsmayıl Yüksək, 90+4), Zayts (Mərt Hakan Yandaş, 90), İrfan Can Kahveci (Rossi, 75), Arda Gülər, Batşuayi (Oostervolde, 90), Valensiya (Kinq, 75).
Sivasspor: Əli Şaşal Vural, Robin Yalçın (Əlaəddin Okumuş, 77), Qutas, Canər Osmanpaşa, Uğur Çiftçi, Xarisis (Hakan Arslan, 64), Kofi (Yatabare, 77), Ulvestad, Sais (Nji, 64), Qradel (Musa, 37), Ceyms.

Ankaragücü – İstanbul BŞ 2:2, əlavə vaxtda (0:1)
Sou, 11. Xatzicovanis, 90 – Sərdar Gürlər, 61. Keni, 111.
İstanbul BŞ: Muhammed Şengezər, Şənər Özbayraklı (Dəniz Türüç, 46), Duarte, Mahmut Təkdəmir, Lima, Bilya (Keni, 96), Yanuzay (Canər Ərkin, 96), Ömər Əli Şahinər, Berkay Özcan, Sərdar Gürlər (Aleksiç, 84), Fiqeyredo (Muhammet Arslantaş, 113).

ƏLİ RAUFOĞLU