“Formula-1”in monakolu pilotu Şarl Leklerin ev yarışında istifadə etdiyi dəbilqə xeyriyyə məqsədli hərracda rekord məbləğə satılıb.

"Football-plus.az" xəbər verir ki, Şarl dağıdıcı daşqınlardan sonra Emiliya-Romanya yardım fonduna kömək etmək üçün dəbilqəsini, yarış kostyumunu, əlcəklərini və çəkmələrini “Sotheby’s” hərrac evinə bağışlayıb.

Şarla aid qırmızı-ağ üslubda, eyni zamanda mərhum atası Herve Leklerin xatirəsinə uyğun rənglənən dəbilqə pilot tərəfindən imzalanıb və orijinallıq sertifikatı ilə təqdim olunub. Yeni sahibi dəbilqəni 306 min avroya alıb – bu, hərraclar tarixində yarış dəbilqəsi üçün yeni rekord qiymətdi. Əvvəlki rekord 2019-cu ildə Ayrton Sennanın 1990-cı ildə taxdığı dəbilqə 162 min avroya satılarkən qeydə alınıb.

Leklerin yarış kostyumu 61200, çəkmələri 20400, əlcəkləri 42000 avroya satılıb. Yəni xeyriyyə fonduna ona məxsus əşyaların satışından ümumilikdə 429 min 600 avro daxil olub.