Tur cümə günü “Dinamo”nun gözlənilmədən öz meydanında autsayder “Fakel”ə uduzmasıyla start götürdü.

Özü də yüzillik yubileyini qeyd edən Moskva klubu bu matça xüsusi retro formalarla çıxmışdı! “Fakel” səfərdəki 25 oyunluq qələbəsiz seriyaya son qoydu! Elitada cəmi 5-ci mövsümünü keçirən Voronej təmsilçisi turnirdə son səfər qələbəsini 2001-ci ilin 2-ci turunda “Alaniya” ilə oyunda əldə etmişdi.

Rusiya futbolunda hegemonluğunu davam etdirən və finiş xəttinə çatmaq üzrə olan “Zenit” Samarada “Krılya Sovetov”u darmadağın etdi. Özü də hesabı meydan sahibləri açmışdı. Düzdü, “Krılya Sovetov” 41-ci dəqiqədən etibarən azlıqda qaldı. Amma həmin ana qədər qonaqlar artıq hesabda öndə idilər. Görüş Malkomun benefisinə çevrildi. “Sambaçı” 4 qol birdən vuraraq müstəqil Rusiya çempionatı tarixində Jo (ÇSKA, 2006), Vaqner Lav (ÇSKA, 2008), Smolov (“Krasnodar”, 2016), Yeroxin (“Zenit”, 2018) və Dzyubadan (“Zenit”, 2021) sonra poker edən 6-cı futbolçu oldu! Malkom həm də qollarının sayını 22-yə yüksəldərək bombardirlər yarışındakı liderliyini möhkəmləndirdi. Rusiya çempionatında bir mövsümə ən çox qol vurmaqla bağlı rekord Veretennikova məxsusdu. Əfsanəvi forvard 1995-də “Rotor”un heyətində 25 qol vurmuşdu. Düzdü, 2011/12-də Dumbiya ÇSKA-nın heyətində 28 dəfə fərqlənmişdi Amma həmin vaxt Rusiya futbolu “payız-yaz” sisteminə keçdiyindən mövsüm 44 turdan ibarət idi. Yeri gəlmişkən, “Zenit” artıq növbəti tur “Spartak”ı məğlub edəcəyi təqdirdə çempionluğu rəsmiləşdirə bilər. Amma bunun üçün 2-ci pillədəki “Rostov” “Fakel”lə ev oyununda mütləq xal itirməlidi.

Turun mərkəzi oyununda Valeri Karpinin çalışdırdığı “Rostov” “Spartak”ı səfərdə yenməyə yaxın idi. Amma Sobolev əsas vaxta əlavə olunmuş 4-cü dəqiqədə başla vurduğu qolla Moskva nəhəngini məğlubiyyətdən xilas etdi. Qış fasiləsindən bəri çox inamlı təsir bağışlayan ÇSKA və “Lokomotiv” hesabına növbəti qələbəni yazdı. ÇSKA öz sevimli məkanında – Qroznıda qalib gəldi. “Hərbçilər” burda “Axmat”a qarşı 16 oyunun 10-da zəfər əldə ediblər. “Loko” isə autsayder “Ximki”ni darmadağı etdi. Dubl edən Dzyuba “dəmiryolçular”ın heyətində premyer-liqada 8-ci oyunda vurduğu qolların sayını 8-ə çatdırdı.