İyunun 2-4-ü aralığında A seriyasında sonuncu - 38-ci turun oyunları keçirildi. Bununla da bu liqanın 2022/23 mövsümünə rəsmən yekun vuruldu. Amma İtaliya çempionatında bir məsələyə görə əlavə oyunun da həyəcanı yaşanacaq.

"Football-plus.az" xəbər verir ki, artıq 37-ci turdan sonra A seriyasında bu liqadan Çempionlar Liqasına (ÇL) ayrılan digər üç vəsiqənin sahibi müəyyənləşmişdi. Başqa sözlə, bu turnirdə iştirak uğrunda mübarizəyə yekun vurulmuşdu. Mövsümün sonuncudan əvvəlki turunda qeydə alınan nəticələrdən sonra İtaliyanı ÇL-də “Napoli”dən sonra “Latsio”, “İnter” və “Milan”ın təmsil edəcəyi rəsmiləşmişdi. Son tur hansı komandaların gümüş və bürünc mükafatçılar olacağı, Avropa Liqası (AL) və Konfrans Liqasına (KL) ayrılan vəsiqələrin necə bölüşdürüləcəyi baxımından əhəmiyyət daşıyırdı.
Finişə 5 tur qalmış çempion olan “Napoli” son oyunu doğma azarkeşləri qarşısında keçirdi. Rəqibin B seriyasına düşən “Sampdoriya” olması matçın ev sahiblərinin xeyrinə nəticələnəcəyini qaçılmaz edirdi. Cənublular genuyalıları iki cavabsız qolla məğlub etdilər. Final fitindən sonra tarixində 3-cü dəfə skudettonu qazanan Luçano Spallettinin komandasının təltifat mərasimi keçirildi.

Tura 2-ci yerdə başlayan “Latsio” azarkeşlərini növbəti dəfə sevindirdi. Paytaxt təmsilçisi səfərdə “Empoli”yə 2:0 hesabıyla qalib gəlməklə mövqeyini qorudu. Bu qələbə Mauritsio Sarrinin komandasının gümüş mükafatçı olduğunu rəsmiləşdirdi. Xatırladaq ki, qitənin ən nüfuzlu klub turnirində 3 ildən sonra oynayacaq “qartallar” A seriyasında sonuncu dəfə belə yüksək yeri 23 il əvvəl tutmuşdular. Onda paytaxt klubu skudettonu qazanmışdı.
“İnter” də mövsümü qələbə ilə başa vurdu. Simone İnzaqinin komandası səfərdə “Torino”ya minimal hesabla qalib gəldi. Bürünc mükafata sahib çıxan milanlılar ÇL-in “Mançester Siti” ilə iyunun 10-da keçiriləcək finalı ərəfəsində əhval-ruhiyyəni bir qədər də yüksəltdilər.

Milanın eyniadlı komandası da ÇL-in növbəti mövsümündə iştirakını rəsmiləşdirəndən sonra çempionatın son oyununda qalib gəldi. Amma “Verona” üzərindəki 3:1 hesablı qələbə son çempionun mükafatçılar sırasına düşməsinə imkan vermədi. Stefano Pyolinin komandası “İnter” Turində maksimum nəticəyə nail olduğu üçün bürünc medallara belə nail ola bilmədi. Matçın diqqəti daha çox cəlb edən məqamı isə final fitindən sonra İbrahimoviç üçün keçiriən tədbir oldu. Yerli tifozi parlaq karyerasını başa vuran 41 yaşlı hücumçunu təmtəraqla yola saldı: “Milan”ın azarkeşlərinin tribunalarda “Godbye” yazısını canlandırması xoş mənzərə formalaşdırmışdı. Onların ingilis sözləri olan “God” (Tanrı) və “Goodbye”ı (əlvida) birləşdirməklə Zlatanı yaşıl meydandan özünün də dediyi kimi, Tanrı qismində yola salmaq planı qeyri-adi idi...

Maraqlıdı ki, son tura cədvəlin ilk 7 pilləsində başlayan bütün komandalar qələbə qazandı. Bu isə o demək oldu ki, evdə debütant “Montsa”nı 5:2 hesabı ilə məğlub edən “Atalanta” və “Spetsiya”ya 2:1 hesabıyla qalib gələn “Roma” mövqeyini qorumaqla AL-ə vəsiqəni təmin etdi. Bu faktlar “Yuventus”un işinə yaramadı. Udinedə yeganə qolla qalib gələn ölkə nəhəngi avrokubokların növbəti mövsümündə yalnız KL-də oynaya biləcək. Əlbəttə, əvvəlki rəhbərliyin maliyyə saxtakarlığına görə 10 xaldan məhrum edilməsinin məşqçi və futbolçu heyətinin bütün zəhmətini heçə endirdiyini qeyd etməliyik. “Yuventus” əks halda mövsümü 3-cü yerdə başa vuracaqdı...

Son tur “Spetsiya” və “Verona” azarkeşləri üçün də böyük həyəcanla keçdi. Əvvəlki turda B seriyasına bu komandalardan birinin düşəcəyi dəqiqləşmişdi. Finiş ərəfəsində hərəyə 31 xal toplayan autsayderlərin uduzması vəziyyəti dəyişmədi. Reqlamentə əsasən, iyunun 11-də “Spetsiya” və “Verona” arasında keçiriləcək əlavə oyunda mövsümün 3-cü uğursuzu müəyyənləşəcək.

38-ci tur
Sassuolo – Fiorentina 1:3
Berardi, 70-p. – Kabral, 47. Saponara, 79. Qonsales, 83. (12456)
Fiorentina: Çerofolini, Terziç, Ranyeri, Lukas Martines, Dodo (Venuti, 73), Dunkan (Bonaventura, 58), Amrabat (Byanko, 82), Kastrovilli, Kuame (Qonsales, 57), İkone (Saponara, 73), Kabral.
Torino – İnter 0:1
Brozoviç, 37. (??????)
İnter: Handanoviç, A.Bastoni (Açerbi, 65), De Vrey, Darmian, Qosens (Bellanova, 74), Dyumfris, Çalhanoğlu (Barella, 55), Brozoviç, Qalyardini, Lautaro Martines (Ceko, 55), Lukaku.
Empoli – Latsio 0:2
Romanyoli, 48. Luis Alberto, 90+2. (?????)
Latsio: Provedel, Luka Pelleqrini, Romanyoli (Kazale, 71), Patrik, Hüsay, Luis Alberto, Vesino (Kataldi, 71), S.Milinkoviç-Saviç (Bertini, 90+3), Pedro (Zakkanyi, 63), Felipe Anderson, İmmobile.
Napoli – Sampdoriya 2:0
Osimhen, 64-p. Simeone, 85. (??????)
Napoli: Meret, Estiqor, Rrahmani, Di Lorentso, Ruy (Bereşinski, 77), Zyelinski (Qaetano, 68), Lobotka, Zambo Angissa (Demme, 80), Kvaratsxeliya, Elmas (Raspadori, 68), Osimhen (Simeone, 77).
Milan – Verona 3:1
Jiru, 45+1-p. Leao, 85; 90+1 – Faraoni, 72. (??????)
Milan: Menyan (Mirante, 89), Ernandes, Tomori, Tiav, Kalabriya (Florentsi, 84), Kruniç (Pobeqa, 71), Tonali, Leao, Dias (De Ketelare, 71), Messias (Salemakers, 85), Jiru.
Atalanta – Montsa 5:2
Koopmeyners, 12; 45+1; 79. Heylunn, 74. Muriel, 90+2 – Kolpani, 51. Petanya, 81. (????)
Atalanta: Sportyello (Rossi, 88), Skalvini (Okoli, 60), Cimşiti, Toloy, Zappakosta, Ederson (De Nipoti, 88), De Roon, Mehle, Koopmeyners, Paşaliç (Lukmen, 60), Heylunn (Muriel, 83).
Roma – Spetsiya 2:1
Zalevski, 43. Dibala, 90+1-p. – Nikolau, 6. (62242)
Roma: Svilar, Smollinq, Mançini (Viynaldum, 82), Çelik (Lyorente, 46), Bove (Matiç, 64), Zalevski, Kristante, Əl-Şaaravi, Lorentso Pelleqrini, Belotti (Abraham, 64/Spinatsola, 80), Dibala.
Udineze – Yuventus 0:1
Kyeza, 68.
Yuventus: Şçensnı, Danilo, Bonuççi (Ruqani, 90+4), Qatti, Kuadrado, Miretti (Di Mariya, 61), Lokatelli, Rabyo, Kostiç (Aylinq, 46), Kyeza (Paredes, 79), Milik (Ken, 79).
Kremoneze – Salernitana 2:0
Buonayuto, 26-p. Tsacut, 88.
Leççe – Bolonya 2:3
Banda, 17. Uden, 88 – Arnautoviç, 58. Zirkzee, 81. Ferqyuson, 90+6.

Yekun cədvəl
1. Napoli 38 28 6 4 77-28 90
2. Latsio 38 22 8 8 60-30 74
3. İnter 38 23 3 12 71-42 72
4. Milan 38 20 10 8 64-43 70
5. Atalanta 38 19 7 12 66-48 64
6. Roma 38 18 9 11 50-38 63
7. Yuventus (-10) 38 22 6 10 56-33 62
8. Fiorentina 38 15 11 12 53-43 56
9. Bolonya 38 14 12 12 53-49 54
10. Torino 38 14 11 13 42-41 53
11. Montsa 38 14 10 14 48-52 52
12. Udineze 38 11 13 14 47-48 46
13. Sassuolo 38 12 9 17 47-61 45
14. Empoli 38 10 13 15 37-49 43
15. Salernitana 38 9 15 14 48-62 42
16. Leççe 38 8 12 18 33-46 36
17. Spetsiya 38 6 13 19 31-62 31
18. Verona 38 7 10 21 31-59 31
19. Kremoneze 38 5 12 21 36-69 27
20. Sampdoriya 38 3 10 25 24-71 19
Bombardirlər: Osimhen (Napoli) - 26, Lautaro Martines (İnter) - 21, Dia (Salernitana) – 16, Leao (Milan) - 15, Lukmen (Atalanta), Jiru (Milan), Nzola (Spetsiya) - 13.

Turun rəqəmi
1 - “Napoli” - “Sampdoriya” matçında penalti ilə hesabı açan Osimhen bu mövsüm vurduğu qolların sayını 26-ya çatdırdı. 24 yaşlı nigeriyalı hücumçu A seriyasının 125 illik tarixinə bu liqanın ən yaxşı bombardiri olan ilk afrikalı futbolçu kimi düşdü. “Napoli”də üçüncü mövsümünü başa vuran Viktor İtaliya çempionatında qapılara 50 dəfə yol tapıb.

Turun ulduzu
Teun Koopmeyners (Atalanta) – niderlandlı yarımmüdafiəçi “Montsa” ilə matçda komandasının vacib qələbəsində (5:2) böyük rol oynadı. Koopmeyners nəticəyə 3 qol və Heylunna verdiyi məhsuldar ötürmə ilə təsir etdi.

Turun sitatı
Luçano Spalletti, “Napoli”nin baş məşqçisi: “İndi ayrılmaq kluba göstərilən əsl sevgidi. “Napoli”yə məndə olan hər şeyimi verdim. Artıq sevimli işimi davam etdirmək üçün gücüm qalmayıb. Hətta 10 ildən sonra Neapola qayıdaraq bu şəhərin bir çox sakini ilə dostluq edə biləcəyimi düşünmək mənim üçün xoşdu.