Çempionluğu qeyd etməyə hazırlaşan ''Qalatasaray''a sabiq futbolçusu Omar Elabdellauidən bəd xəbər gəlib. Bilindiyi kimi təcrübəli müdafiəçinin müqaviləsi mövsümün əvvəlində İstanbul nəhəngi tərəfindən birtərəfli qaydada ləğv edilmişdi. Halbuki Elabdellauinin hələ birillik müqaviləsi qalmışdı və o, haqlı olaraq FİFA-ya şikayət etmişdi.

"Football-plus.az" xəbər verir ki, FİFA dünən məsələ ilə bağlı qərarını açıqlayıb və 31 yaşlı futbolçu belə desək, qalib gəlib.

''Cim-Bom'' bu oyunçuya 2 milyon 820 min avro təzminat ödəməli olacaq. Özü də bu məbləğ qarşıdakı 45 gün ərzində ödənilməsə, ''sarı-qırmızılar''a transfer qadağası verilə bilər!

Xatırladaq ki, norveçli futbolçu ''Qalatasaray''a 2020-nin yayında gəlmişdi. İlk aylarda pis təsir bağışlamasa da, həmin ilin dekabrın 31-də böyük bir şanssızlıq yaşamışdı. Elabdellaoui yeni ili ailəsi ilə qeyd edərkən ehtiyatsızlıq üzündən əlində fişəng partlamış və o, gözündən ciddi xəsarət almışdı.

Nəticədə futbolçu yalnız 15 ay sonra yaşıl meydanlara qayıtmış və 2021/22-nin 2-ci dövrəsində bəzi oyunlarda iştirak etmişdi.

Ötən yay Elabdellaui əvvəlcə Okan Burukun planlarına daxil olsa da, sonradan Dyubuanın transfer olunması və Boenin performansını artırması üzündən artıq kluba lazım olmamışdı.

Hazırda Elabdellaui Norveç çempionatının lideri ''Bude Qlimt''də top qovur.

ƏLİ