Rumıniyalı oyunçularla yollarını ayırdıqdan sonra ''Qalatasaray'' daha bir əcnəbi futbolçu ilə vidalaşmağı lazım bilib.

Söhbət Omar Elabdellauidən gedir. Amma budəfəki ayrılıq bir qədər qalmaqallı alınıb. Əslində 30 yaşlı sağ cinah müdafiəçisinin bu aqibətlə üzləşəcəyi gözlənilən idi. Bu yay onun mövqeyinə fransalı Leo Dyubua transfer edilmişdi. Üstəlik həmin mövqedə Saşa Buy da var. Okan Buruk bu mövsüm yola bu iki oyunçu ilə davam etməyi planlaşdırırdı. Avqustun sonlarında belə bir şayiə yayılmışdı ki, Elabdellaui ayrılmaq üçün ''Qalatasaray''dan illik məvacibini, yəni 1,4 milyon avro tələb edir. Çünki onun klubla hələ birillik müqaviləsi var idi. Fanatlar bu duruma etirazını bildirincə Elabdellaui hər şeyə özü aydınlıq gətirmək qərarına gəldi. Sosial şəbəkədəki səhifəsində geniş bir yazılı açıqlama paylaşan təcrübəli futbolçu rəhbərlikdən pul tələb etməsi barədə deyilənlərin tam yalan olduğunu bildirdi. Amma norveçlinin açıqlamasında onun ''Qalatasaray''dan incik olduğu hiss edildi. Çünki ''Aslan'' bu futbolçuya yalnız Avropada transfer dönəminin bitməsinə bir gün qalmış yolları ayırmaq istədiyini xəbər verdi. Bundan başqa, Elabdellauinin sözündən belə qənaətə gəlmək olar ki, baş məşqçi Okan Buruk hazırlıq dönəminin əvvəlində ona komandada qalacağına söz veribmiş. Elabdellaui bu açıqlama ilə necə deyərlər, qaş düzəltmək istədiyi yerdə vurub gözü də çıxardı. ''Qalatasaray'' rəhbərliyi onun sözlərindən əsəbləşərək müqaviləni birtərəfli qaydada ləğv etdi!

İndi Omarın klubdan şikayət etmək haqqı var. Xatırladaq ki, bu futbolçu ''Cim-Bom''a 2020-də azad agent statusunda gəlmişdi. Elə həmin il dekabrın 31-də o, evdə ailəsi ilə Yeni ili qeyd edərkən bədbəxt hadisə nəticəsində gözündən ciddi xəsarət almış və uzun müddətə sıradan çıxmışdı. O ümumilikdə 2 mövsüm ərzində cəmi 20 rəsmi oyuna çıxaraq 1 məhsuldar ötürmə ilə fərqləndi.