''Qalatasaray''da Domenek Torrent dönəmi, nəhayət, rəsmən başa çatdı.

Bilindiyi kimi, kataloniyalı mütəxəssis bazar ertəsi yeni rəhbərliklə görüşmək və təzminat məsələsini həll etmək üçün İstanbula gəlmişdi. Onun gəlişinin üstündən 24 saat ötməmiş bu ayrılıq klub tərəfindən rəsmən açıqlandı. Qeyd edək ki, bu vəzifəyə yanvarın 14-də gələn 59 yaşlı mütəxəssisin dönəmi cəmi 158 gün davam etdi. ''Qalatasaray'' onun rəhbərliyi altında 18-i superliqa, 2-si Avropa Liqasında olmaqla keçirdiyi 20 qarşılaşmadan 7 qələbə, 5 heç-heçə, 8 məğlubiyyətlə ayrıldı. O, ''Qalatasaray''ı 20-ci turda 12-ci pillədə qəbul etmişdisə, komanda mövsümü 13-cü pillədə tamamladı. Torrent orta hesabla hər oyuna toplanılan xal baxımından az da olsa, Fatih Terimi üstələdi. ''İmperator''un dönəmində ''Cim-Bom'' ilk 20 superliqa matçından 7 qələbə, 6 heç-heçə, 7 məğlubiyyətlə (top fərqi - 24:24) ayrılaraq 27 xal topladı ki, bu da hər oyuna 1,35 xal deməkdi. Torrentin dönəmində isə komanda 18 superliqa oyunundan 7 qələbə, 4 heç-heçə, 7 məğlubiyyətlə (27:29) ayrılaraq 25 xal topladı ki, bu da hər oyuna 1,38 xal deməkdi.

Hamını maraqlandıran təzminat məsələsinə gəlincə, burda qaranlıq məqamlar var. Çünki klubun rəsmi saytında ayrılıqla bağlı yerləşdirilən bəyanatda məşqçiyə ödənilən təzminatın həcmi qeyd olunmayıb. Mətbuatda isə fərqli versiyalar ortaya atılır. Məsələn, ''ajansspor'' saytının iddiasına inansaq, ''Qalatasaray'' Torrentin son 1 ayda komandaya məşq keçmədiyini, yəni öhdəliklərini yerinə yetirmədiyini əsas gətirərək, müqaviləni birtərəfli qaydada pozub və məşqçiyə heç bir təzminat ödəməyib! Amma digər əksər mənbələrin versiyasına görə, ''sarı-qırmızılar''ın büdcəsindən 2 milyon 150 min avro çıxıb. Bu məbləğin 1,5 milyon avrosu Torrentin özünə, 650 min avro isə onun 5 köməkçisi və özü ilə birlikdə gətirdiyi ispaniyalı skauta çatacaq. İdman direktoru Paskuale Sensibile ilə də 660 min avro təzminat qarşılığında yolların ayrıldığını nəzərə alsaq, əvvəlki başqan Burak Elmasın dönəmində kluba gətirilən bu şəxslərdən qurtulmaq üçün İstanbul nəhəngi təxminən 2,8 milyon avro ödəmək məcburiyyətində qalıb. Hətta ''sporx'' saytının yazdığına inansaq, Torrent gələn mövsüm üçün müqaviləsində qeyd olunan bonusları da tələb edib! O, rəhbərliklə görüşdə ''vəzifədə qalsaydım, ''Qalatasaray''ı çempion edəcəkdim. Amma belədə bonusları qazanmaq fürsətim də əlimdən alındı. Çempionluq bonusu da daxil olmaqla müqavilədə qeyd olunan haqlarımın hamısını tələb edirəm'' deyib. Amma ortada rəsmi məbləğ açıqlanmadığına görə bunun həqiqət olub-olmadığını bilmirik. İstənilən halda Torrentdən qurtulan ''Qalatasaray''da ən qısa müddətdə Okan Buruk dönəminin başlayacağı gözlənilir.

ƏLİ