Ötən turdan fərqli bu tur o qədər də məhsuldar alınmadı.

Cümə günü keçirilən açılış matçında “Alanyaspor” Ömər Ərdoğanın debüt oyununda “Ümraniyəspor”u minimal hesabla yendi. “Fatih Karagümrük” “Antalyaspor”la ev oyununda favorit statusunu doğrulda bilməyərək məğlub oldu. Bu, Antalya təmsilçisinin 2023-cü ildə ilk səfər qələbəsi oldu. Ən məhsuldar komandalardan “Fatih Karagümrük” bu mövsüm cəmi 4-cü dəfə qola həsrət qaldı.

Son çempion “Trabzonspor” Nenad Byelitsanın başçılığı altında da məğlubiyyətləri sıralayır. Ötən həftə Sivasda qeydə alınan 1:4 hesablı acı məğlubiyyətdən sonra bu dəfə komanda Konyadan xalsız qayıtdı. Meydan sahiblərinin heyətində yığmamızın üzvü Mahir Emreli fasilədən sonra meydana çıxdı. O, vurulan qolda yaxından iştirak etməsə də, ardıcıl 2-ci turda məhz Mahir meydana çıxandan sonra konyalıların qələbə qolunu vurması diqqəti çəkdi. Qonaqların bütün 2-ci hissəni azlıqda keçirdiyini də bildirək. Belə ki, komandanın lideri Bakasetas “Trabzonspor”un heyətində 100-cü rəsmi oyunda qırmızı vərəqə aldı. Özü də yunan futbolçu birbaşa qırmızı vərəqə aldığından, çox güman, 34-cü turda “Fənərbaxça” ilə oyunu buraxmalı olacaq. Byelitsa “Trabzonspor” tarixində ilk iki superliqa matçından xalsız ayrılan birinci məşqçi oldu! Texniki qələbəni saymasaq, qaradənizlilərin superliqada səfərdəki qələbəsiz seriyası isə 9 oyuna çatdı (2 heç-heçə, 7 məğlubiyyət). 30 oyun keçirən “Trabzonspor” ardıcıl 5-ci dəfə qələbəyə həsrət qalmaqla 8-ci pilləyə yuvarlandı. Maraqlıdı ki, ardıcıl 3-cü mövsümdü son çempion statusunda olan komanda 30 oyundan sonra “avrokubok zonası”ndan kənardadı!

Ötən tur “İstanbulspor”la ev oyununda dramatik şəkildə qələbəni əldən verən “Fənərbaxça” bu dəfə çətin Sivas səfərində ümidləri doğrultmağı bacardı. Özü də mövsümün əsas bombardiri Valensiya oyunun əvvələrində zədələnərək əvəzlənsə də, Jorje Jezuşun komandası artıq ilk yarıda 3 qol vurmaqla intriqanı fasiləyə qədər öldürdü. Düzdü, İrfan Can Kahvecinin qırmızı vərəqə almasından sonra İstanbul nəhəngi ikinci hissəni azlıqda keçirməli oldu. Amma meydan sahiblərinin gücü yalnız qollardan birinin əvəzini çıxmağa yetdi. “Fənər” səfərdə ardıcıl 5-ci qələbəsini qazandı. Jezuşdan əvvəl bunu bacaran sonuncu əcnəbi mütəxəssis 2007/08-də Ziko olmuşdu. Onu da vurğulayaq ki, “sarı-lacivərdlilər” 2017/18-dən bəri ilk dəfə “Sivasspor”u mövsümün hər iki oyununda yenməyi bacardılar.
Bu tur bütün diqqətlər “Vodafon Park”a yönəlmişdi. Lider “Qalatasaray”ın yüksəlişdə olan “Beşiktaş”la səfər derbisində necə təsir bağışlayacağı böyük maraq doğururdu. Həm də “Fənər”in turu qələbə ilə başa vurması “sarı-qırmızılar”ın üzərində əlavə təzyiq yaradırdı. Oyun qonaqlar üçün uğurlu başladı. Prinsipial matçlarda vurduğu qollarla diqqəti çəkən İkardi əks-hücum zamanı bir toxunuşla topu tora göndərdi. Maraqlıdı ki, bu, “Cim-Bom”un ilk yarıda “çərçivə”yə vurduğu yeganə zərbə oldu. Fanatları önündə bu nəticə ilə barışmaq istəməyən “Beşikaş” irəli atıldı və artıq fasiləyə qədər hesabı bərabərləşdirdi. Masuakunun künc zərbəsindən asması zamanı Saiss başla topu tora göndərdi. “Qartal” 2-ci hissəyə fırtına kimi başladı. Abubakar bir neçə gözəl fürsəti boşa versə də, səhnəyə başqa futbolçu – Haciahmetoviç çıxdı. Oliveyradan topu oğurlayan bosniyalı yarımmüdafiəçi yaxın küncü dəqiq nişan aldı. Son yarım saatda “Beşiktaş” qələbə hesabını qorumaqla yanaşı, ara-sıra təhlükəli əks-hücumlar da qurdu. “Qalatasaray” nə qədər çalışsa da, bərabərlik qolunu vura bilmədi. Bu azmış kimi, son saniyələrdə Muslera Abubakarın zərbəsindən sonra 3-cü dəfə topu tordan çıxarmalı oldu. Maraqlıdı ki, Saisslə Haciahmetoviç məhz bu oyunda “Beşiktaş”da qol hesabını açdısa, Abubakar Türkiyə karyerasında ilk dəfə “Qalatasaray”a qol vurdu. Son 9 turda 8-ci qələbəsini qazanan “Beşiktaş” həm “Qalatasaray”la xal fərqini 5-ə endirdi, həm də şəxsi oyunlarda üstünlüyü ələ keçirdi. Şenol Günəş məşqçi karyerasında Okan Buruka qarşı 9-cu superliqa matçında 7-ci qələbəsini qazandı. Eyni zamanda Günəş Qordon Milni geridə qoyaraq “Beşiktaş”ın başında “Qalatasaray”ı ən çox (6 dəfə) məğlub edən məşqçiyə çevrildi. Bu mövsüm İstanbul derbilərində ilk dəfə uduzan “Qalatasaray”la 2-ci pillədəki “Fənər” arasında xal fərqi 3-ə endi.

Turun rəqəmi
14 – “Vodafon Park” “Beşiktaş”ın əzəli rəqibləri üçün alınmaz qalaya çevrilib. Bu stadion 2016-cı ildə istifadəyə verilib. İl olub 2023, amma hələ də superliqa çərçivəsində burda nə “Qalatasaray” qələbə görüb, nə də “Fənərbaxça”! “Qartal” Türkiyə çempionatında bu arenada keçirdiyi 14-cü derbidə də məğlub olmadı (8 qələbə, 6 heç-heçə)! 8 qələbədən 2-si “Fənərbaxça”, 6-sı “Qalatasaray” üzərində qazanılıb. Özü də “Cim-Bom”a qarşı evdə ardıcıl 6-cı qələbə əldə olundu ki, daha öncə bu derbinin tarixində “ağ-qaralar”ın belə seriyası olmamışdı.

Turun ulduzu
Fərdi Kadıoğlu (Fənərbaxça) – universallığına və işguzarlılığına görə fanatların sevimlisi olan futbolçunun bəlkə də ən zəif nöqtəsi aşağı məhsuldarlığıdı. Amma belə desək, bayramdan-bayrama fərqlənən istedadlı futbolçu bu tur birdən-birə 2 qol vuraraq komandasınını qələbəsində vacib rol oynadı. Fərdi Türkiyə çempionatında ilk dəfə səfər qarşılaşmasında dubl etdi. Buna qədər o yalnız bir dəfə - 2020-nin iyulunda “Göztəpə” ilə ev oyununda dubl etmişdi. Ümumilikdə 77 superliqa matçında onun hesabında cəmi 10 top var.