Son günlər ölkə gündəmini bir xəbər zəbt edib. Söhbət Ramil Şeydayevin “Qarabağ”ı tərk etməsindən gedir.

Yığma üzvü Taylandın son çempionu “Buriram Yunayted”lə anlaşıb. Bu komanda bizim üçün yaddı. Boşluğu aradan qaldırmaq üçün gəlin, müəyyən araşdırma aparaq.

“Buriram Yunayted” Tai Liqa 1-də çıxış edir. Eyniadlı şəhəri təmsil edən klub 1970-ci ildə yaradılıb. İlk adı PEA FC (Provincial Electricity Authority Football Club – Əyalət Elektrik Təşkilatı Futbol Klubu) olub. 2010-ci ildə “Buriram PEA”, 2012-də isə “Buriram Yunayted” adlanıb. Ləqəbi “şimşək qalası”dı. Ev oyunlarını 32600 yerlik “Çanq Arena”da keçirir.

“Şimşək qalası” olduqca uğurlu klubdu. Tarixi ərzində 9 ölkə çempionluğu qazanıb, 5 dəfə kubokun, 5 dəfə də Liqa kubokunun qalibi olub. 2011-ci ildə isə trebl edərək ölkə futboluna adını yazdırıb. “Buriram Yunayted” Tayland tarixində bu uğuru qazanan ilk və tək kollektivdi. Asiya Çempionlar Liqasında da çıxış edir. Bu turnirdə ən böyük uğuru 2013-cü ilə təsadüf edib. 1/4 finala yüksələn kollektiv İran “İstiqlal”ına hər iki görüşdə məğlub olmaqla mübarizəni dayandırıb.

Gördüyünüz kimi, Ramil heç də zəif kluba getmir. “Buriram Yunayted”in İngiltərə “Lester”i və Almaniya “Borussiya”sı (Dortmund) ilə əməkdaşlığı var. Britaniya təmsilçisi “Tayland səninlə gülümsəyir” layihəsini həyata keçirir. Burda məqsəd “Buriram Yunayted”in bəzi əsas heyət futbolçularının Avropaya transferini asanlaşdırmaqdı. Dortmund klubu ilə isə gənc futbolçuların yetişdirilməsi ilə bağlı iş görülür. U-9-dan U-21-ə kimi komandalarda top qovanlar “Borussiya”nın sistemindən yararlanır. Klubun 10 sponsoru arasında “Yamaha” və “Coca-Cola” şirkətləri də yer alıb.

Bir daha qeyd edək ki, “şimşək qalası” 2022/23 mövsümünün qalibidi. Komandanı hazırda Masatada İşi çalışdırır. 56 yaxşı mütəxəssisin müqaviləsinin müddəti mayın 31-də bitəcək. Çox güman, rəhbərlik onunla əməkdaşlığa davam edəcək. Çempion komandanın heyətində 7 legioner, 10 milli üzvü çıxış edir. Buriram təmsilçisinin qarşıda iki hədəfi var. Kubokun mayın 28-də keçiriləcək finalında “Banqkok Yunayted”i üstələmək və Asiya Çempionlar Liqasında uğurlu çıxış etmək.

Əslində CV olaraq “Buriram Yunayted” yaxşı kollektivdi. Lakin Ramil Şeydayev karyerasını Avropada davam etdirsəydi, daha yaxşı olardı. Çünki millimizin üzvü bu potensialdadı. Avropalı futbolçular əsasən 30 yaşından sonra Asiyaya üz tutur. Ramil isə bu baxımdan tələsib. Elə “Qarabağ”la müqavilə yeniləyərək qarşıdakı mövsümlərdə Avropanın ortabab liqalarına da üz tuta bilərdi.

İLKİN SULTANLI