Premyer-liqada 34-cü tur başa çatdı.

Hesabat turu ölkə çempionunun müəyyənləşməsi ilə yadda qaldı. “Qarabağ”ın tarixində 10-cu “qızıl”ını qazanacağına heç kimin şübhəsi olmasa da, Qurban Qurbanovun komandası “Səbail”i səfərdə böyük hesabla yenməklə 2-ci ulduzu sinəsinə taxacağını rəsmiləşdirdi. “Dənizçilər”in isə elitada qalıb-qalmayacağı hələ məlum deyil. Düşmə zolağında olan klub ümidini son iki tura bağlayıb. “Şahin Diniyev komandanı elitada saxlaya biləcəkmi” sualına məhz son oyunlarda aydınlıq gələcək. Bu görüşdə adını iki dəfə tabloya yazdıran Ramil Şeydayev isə bombardirlik yarışında Musa Qurbanlını arxada qoydu.

Son iki qarşılaşmada meydanı qələbə ilə tərk edən “Turan Tovuz” uğurlu seriyanı “Qəbələ” ilə matçda da davam etdirdi. Ayxan Abbasovun komndası çempionatın sonunda sürət yığıb və bunun da nəticəsi kimi 3 görüşdə maksimum nəticə qazanmaqla azarkeşlərinə sevinc bəxş edib. Avrokubok uğrunda mübarizə aparan “qırmızı-qaralar”ın, görünür, çempionatın sonuna yaxın əsəbləri dözmür. Elmar Baxşıyevin çalışdırdığı kollektiv evdə qalib gəlməklə böyük ölçüdə qitəmiqyaslı turnirə 4-cü vəsiqəni həll etmiş olacaqdı. Ancaq tovuzlular buna imkan vermədi.
Premyer-liqada qalacağı dəqiqləşən “Kəpəz” Qəbələdə “Zirə”ni qonaq etdi. Oyundan öncə kağız üzərində Rəşad Sadıqovun komandası favorit göstərilsə də, “sarı-göylər” növbəti dəfə ortaya qoyduğu komanda oyunu ilə ehtimalları alt-üst etdi. “Qartallar”ın baş məşqçisinin matçdan sonra “ümumiyyətlə, hər dəfə “Kəpəz”lə keçirdiyimiz oyunlarda bir hadisə baş verir” söyləməsi çoxları üçün qaranlıq qaldı. Görəsən, Rəşad Sadıqov bu fikirlərlə nəyə işarə edirdi?

“Bürünc”ü təmin edən “Neftçi”də isə eniş davam edir. 32-ci turda “Qarabağ”a, ardından “Turan Tovuz”a məğlub olan “ağ-qaralar”ın “Şamaxı” ilə görüşdə azarkeşlərin könlünü alacağı gözlənilsə də, Cavid Hüseynov – Vüqar Əsgərli tandeminin çalışdırdığı komanda əsl əzmkarlıq göstərərək “Bakcell Arena”da xal qazanmağı bacardı. Düzdü, səfərdə əldə olunan 1 xal sonuncu pilləni tərk etmək baxmından yetərli olmadı. Ancaq sona iki tur qaldığını nəzərə alsaq, bunu 3 xal kimi də dəyərləndirmək mümkündü.

Tura Sumqayıtda yekun vuruldu. Turnir cədvəlinin alt sıralarında məskunlaşan, premyer-liqanı tərk etmək təhlükəsi yaşayan “kimyaçılar” 2-ci yeri təmin edən “Sabah”la qarşılaşdı. Görüş Murad Musayevin komandasının inamlı qələbəsiylə bitdi. Bununla meydan sahiblərinin turu qələbəsiz başa vurması dəqiqləşdi.

Misli premyerliqası
4-cü dövrə, 34-ci tur
12 may
Kəpəz – Zirə 1:1

13 may
Qəbələ - Turan Tovuz 1:2
Səbail – Qarabağ 0:3

14 may
Neftçi – Şamaxı 1:1

17 may
Sumqayıt – Sabah 0:4

1. Qarabağ 34 27 6 1 87-22 87
2. Sabah 34 25 5 4 75-23 80
3. Neftçi 34 18 8 8 59-37 62
4. Qəbələ 34 13 9 12 46-46 48
5. Zirə 34 12 10 12 42-46 46
6. Turan Tovuz 34 10 8 16 33-44 38
7. Kəpəz 34 6 12 16 32-58 30
8. Sumqayıt 34 7 7 20 24-66 28
9. Səbail 34 6 7 21 29-60 25
10. Şamaxı 34 4 12 18 26-51 24

Bombardirlər: Ramil Şeydayev (Qarabağ) – 22, Musa Qurbanlı (Qarabağ) – 20, Coy Lens Mikels (Sabah) – 17, Emin Mahmudov (Neftçi), Aleksey Kaşuk (Sabah) – 16.

Növbəti turun oyunları: 21 may - Kəpəz – Neftçi; 22 may – Qarabağ – Sumqayıt, Turan Tovuz – Səbail, Şamaxı – Qəbələ, Sabah – Zirə.

RƏŞAD