Premyer-liqada 33-cü tur geridə qaldı. Azarkeşlər bir-birindən maraqlı, gərgin mübarizə şəratində keçən, məhsuldar oyunlar izlədi.

33-cü oyun həftəsinin ilk günündə «Kəpəz» Qəbələdə «Sabah”ı qonaq etdi. Ötən tur şübhəli qolla «Sumqayıt”a yenilən «sarı-göylər» «tələbələr”lə görüşdə favorit olmasa da, azarkeşlər Tərlan Əhmədovun komandasından sürpriz gözləyirdi. Ancaq qonaqlar buna imkan vermədi. «Bayquşlar» ilk yarıda vurduğu iki qolla, demək olar ki, matçın taleyini həll etdi. İkinci yarının sonunda isə matçın yekun nəticəsi müəyyənləşdi.

Şamaxıya səfər edən «Zirə» də tərəfdarını böyükhesablı qələbə ilə sevindirdi. İlk dəqiqələrdən üstünlüyə yiyələn «qartallar» meydan sahiblərini 3 dəfə meydanın mərkəzinə dəvət etdi. Avrokuboka vəsiqə uğrunda mübarizə aparan Rəşad Sadıqovun çalışdırdığı kollektiv bu qələbə sayəsində mübarizədən qopmadığını, 4-cü vəsiqəni «Qəbələ”yə erkən güzəşt etməyəcəyini ortaya qoydu. Cavid Hüseynov — Vüqar Əsgərli tandeminin «şirlər”i isə mövsümdə 18-ci dəfə meydanı məğlub tərk etməklə sonuncu pilləyə yuvarlandı. Komanda qarşıdakı turlarda toparlana bilməsə, elita ilə vidalaşmalı olacaq.

Turun sensasiyası, heç şübhəsiz, Tovuzda yaşandı. Ölkə kubokunun yarımfinalında «Turan Tovuz”u mübarizədən kənarlaşdıran «Neftçi» bazar günü «boz qurd”un caynağına keçdi. Ayxan Abbasovun yetirmələri «ağ-qaralar”a heç bir şans tanımadan 4 yerə parçaladı. Matçın qəhrəmanı het-triklə yadda qalan Runi Eva oldu. Artıq «bürünc”ü təmin edən bakılılar isə meydanda sanki sürünürdü. Laurentsiu Regekampfın komandası heç nə ilə yadda qalmadı. Xüsusilə müdafiədəki kobud səhvlər komandaya baha başa gəldi. Voislav Stankoviçin yoxluğunda Solomon Kverkveliyanın «ağsaqqalıq» etdiyi arxa xətt bir daha göstərdi ki, belə müdafiə ilə «ağ-qaralar» çox uzağa gedə bilməyəcək. Rəhbərlik avrokuboklar ərəfəsində müdafiəni gücləndirməsə, səviyyəli oyunçu dəvət etməsə, ilk mərhələdəcə bakılıların burnunu əzəcəklər. Tovuzdakı matç klub rəhbərliyi üçün həyəcan siqnalı olmalıdı. Rumıniyalı mütəxəssis də «Turan Tovuz”la qarşılaşmadan dərs çıxarmalıdı.
Sumqayıtda keçirilən matçda Şahin Diniyevin çalışdırdığı «Səbail» əsl xarakter nümayiş etdirdi. «Dənizçilər» ilk yarını məğlub başa vursa da, ikinci hissədə geridönüş etməyi bacardı. «Səbail”in «Sumqayıt» üzərində qələbəsində Matiya Lyuyiçin xüsisi payı oldu. Serbiyalı yarımmüdafiəçi 3 dəqiqəyə dubl etməklə komandasını qələbəyə daşıdı. «Sumqayıt”a gəlincə, bazar günü keçirilən qarşılaşma bir daha göstərdi ki, Samir Abasovun komandasında ustalıq bir yana, heç xarakter də yoxdu. «Qəbələ» ilə oyunda olduğu kimi, «dənizçilər”lə görüşdə də «kimyaçılar» 70-ci dəqiqədən sonra «əyləci basır». Bu nədən qaynaqlanır? Bu suala artıq Abasov və köməkçiləri cavab tapmalıdı.

Turun son qarşılaşması «Azərsun Arena”da keçirildi. Lider «Qarabağ» 4-cü pillədə qərarlaşan, qarşısına Konfrans Liqasına vəsiqə qazanmağı məqsəd qoyan «Qəbələ”ni qonaq etdi. İlk yarının sonunda hesabı açan meydan sahibləri fasilədən sonra daha iki dəfə fərqlənməklə böyükhesablı qələbə qazandı. Bir qolla yadda qalan Ramil Şeydayev isə bombardirlərin mübarizəsində komanda yoldaşı Musa Qurbanlını haqladı.

Misli premyer-liqası
4-cü dövrə, 33-cü tur
5 may
Kəpəz — Sabah 0:3
6 may
Şamaxı — Zirə 0:3
7 may
Turan Tovuz — Neftçi 4:0
Sumqayıt — Səbail 1:3
8 May
Qarabağ — Qəbələ 3:0

Növbəti turun oyunları: 12 may — Zirə — Kəpəz; 13 may — Qəbələ — Turan-Tovuz, Səbail — Qarabağ; 14 may — Neftçi — Şamaxı; 17 may — Sabah — Sumqayıt.

1. Qarabağ 33 26 6 1 84-22 84
2. Sabah 33 24 5 4 71-23 77
3. Neftçi 33 18 7 8 58-36 61
4. Qəbələ 33 13 9 11 45-44 48
5. Zirə 33 12 9 12 41-45 45
6. Turan Tovuz 33 9 8 16 31-43 35
7. Kəpəz 33 6 11 16 31-57 29
8. Sumqayıt 33 7 7 19 24-62 28
9. Səbail 33 6 7 20 29-57 25
10. Şamaxı 33 4 11 18 25-50 23
Bombardirlər: Musa Qurbanlı , Ramil Şeydayev (hər ikisi «Qarabağ») — 20, Coy-Lens Mikels (Sabah) — 17, Emin Mahmudov (Neftçi), Aleksey Kaşuk (Sabah) — 16.

RƏŞAD