A seriyasının 25-ci turu Spetsiyada keçirilən yeganə oyunla başladı. “Alberto Pikko” stadionunda qeydə alınan nəticə daha çox “Napoli”nin azarkeşlərini sevindirdi.
"Football-plus.az" xəbər verir ki, cümə günü “Spetsiya” üçün əlamətdar nəticə ilə yadda qaldı. A seriyasında qalmağa çalışan bu komanda “İnter”ə qalib gəldi. Leonardo Sempliçinin çalışdırdığı “ağ-qaralar” tarixi qələbə üçün əllərindən gələni etdilər. Əslində milanlıların zəif oynadığını iddia etmək olmaz. Amma nəticə vitse-çempionun xeyrinə olmadı. 13-cü dəqiqədə Lautaro Martines penaltini qola çevirsəydi, nəticə bəlkə də fərqli olacaqdı. Argentinalı hücumçunun zərbəsini dəf edən Dronqovski 83-cü dəqiqədə Lukakunun analoji vəziyyətdən endirdiyi zərbəyə mane ola bilmədi. Ancaq polşalı qapıçının komandasına güclü rəqibdən maksimum xal almaqda böyük psixoloji təsirini qeyd etməliyik. Spetsiyalıların sevinməsində rol oynayan başqa bir oyunçu isə qola və məhsuldar ötürməyə adını yazdıran anqolalı hücumçu Nzola oldu. Beləliklə, “İnter” son 3 çempionat matçında 2-ci dəfə uduzdu.
Əvvəlki turda öz meydanında “Latsio”ya məğlub olan (0:1) “Napoli”nin ölkə çempionatında 8 oyunluq qələbə seriyası qırılmışdı. Lider bu dəfə azarkeşlərini sevindirə bildi. Luçano Spallettinin komandası turun mərkəzi oyununda “Atalanta”nı 2:0 hesabıyla məğlub etdi. Hesabı açan Kvaratsxeliyanın vurduğu qolu izləməyə dəyərdi. 7-8 oyunçunun əhatəsində olan gürcü yarımmüdafiəçi topla yüksək səviyyəli texniki davranışlarından sonra güclü zərbə ilə toru silkələdi. Oyuna tamamilə nəzarət edən neapollular Rrahmani ilə daha bir qol vuraraq “İnter” ilə xal fərqini yenidən 18-ə yüksəltdi. Xatırladaq ki, lider ilə əsas izləyicisi arasında 24-cü turdan sonra da bu qədər fərq vardı.
“Latsio” bu tur 2-ci yerə çıxmaq üçün əla fürsət yaxalamışdı. Lakin Mauritsio Sarrinin komandası Bolonyadan Romaya qolsuz heç-heçənin qazandırdığı minimum xalla qayıtdı. Paytaxtın eyniadlı komandası isə turu xalsız başa vurdu. “Roma”nın evdə “Sassuolo”ya 3:4 hesabı ilə uduzmasına əsasən iki amil təsir etdi. Əvvəla, Joze Mourinyonun komandası həftəiçi Avropa Liqasında “Real Sosyedad”a qalib gəldiyi (2:0) matçda heç də az güc itirməmişdi. “Sassuolo”ya qarşı oyunda isə “canavarlar”ı Kumbulla çətinə saldı. Müdafiəçinin fasilə ərəfəsində kobudluğuna görə qarşısında birbaşa qırmızı vərəqə görməsi qonaqların ilk yarını 3:1 hesabıyla başa vurmasına çox təsir etdi. “Roma” fasilədən sonra on nəfərlə iki qol vursa da, məğlubiyyətdən qaça bilmədi. Başqa sözlə, paytaxtın hər iki klubu Çempionlar Liqasına vəsiqə uğrunda mübarizədə zərbə aldı.
Bu turnirə can atan komandaların büdrəməsi “Yuventus”un işinə yaradı. Zədəli oyunçuların çoxluğu sarıdan korluq çəkən turinlilər evdə mövsümün ən zəif komandalarından “Sampdoriya”ya 4:2 hesabıyla qalib gəldilər.