“Real” kubokun finalının aşkar favoriti sayılsa da, “Osasuna” rəqibə layiqincə müqavimət göstərdi və madridlilər əməlli-başlı əziyyət çəkdi.

Halbuki oyun elə başladı ki, çoxları favoritin tezliklə lazımi nəticəni təmin edəcəyini düşündü. Artıq 2-ci dəqiqədə sol cinahla ənənəvi reydlərindən növbətisini reallaşdıran Vinisiusun asmasından sonra Rodriqo hesabı açdı. Nominal qonaqlar çox tez özünə gəldi və Kurtua da oyuna qoşulmalı oldu. Madridlilər tez-tez ildırım sürəti ilə irəli atılır, Vinisius Monakoyalın arxada qoyurdu. Ancaq üstünlüyü möhkəmləndirmək mümkün olmadı.

Benzemanın zərbəsindən sonra Errera komandasını xilas etdi, Alaba cərimə zərbəsindən topu tirə vurdu. “Osasuna”nın da real qol imkanı var idi. Abde Kurtua ilə randevuya yollansa da, uzaq dirək önündə dayanan Karvaxal qola imkan vermədi. Fasilədən sonra pamplonalılar hesabı bərabərləşdirə bildi – 58-ci dəqiqədə Torro cərimə meydançasının qövsü üzərindən sol aşağı küncə bilyardvari zərbə vurdu. “Osasuna” azarkeşləri sevincdən çılğına dönsə də, tablodakı bərabərlik hesabı uzun müddət qorunmadı.

Yenə əsas rolu Vinisius oynadı. Onun keçidini Kroos tamamladı, səkən top Rodriqonun önünə düşdü və “Real” 2-ci dəfə önə çıxdı. Bununla belə, pamplonalılar sona qədər döyüşdü. Karvaxal epizodların birində topu az qala öz qapısına göndərəcəkdi. Son dəqiqələrdə Vinisius real qol imkanını qaçırdı, ardından Avila yaxın məsafədən Kurtuanı məyus edə bilmədi. Qələbə hesabını qoruyan “Real” “Mançester Siti” ilə oyun ərəfəsində əhval-ruhiyyəsini yaxşılaşdırdı. “Osasuna” isə klub tarixində ilk kuboku qazanmaq imkanını qaçırsa da, azarkeş danlağı eşitməyi haqq etmədi.

Final
Real – Osasuna 2:1

Real: Kurtua, Karvaxal, Militao, Alaba, Kamavinqa, Çuameni (Rüdiger, 69), Kroos (Modriç, 82), Valverde, Rodriqo (Asensio, 89), Benzema, Vinisius.

Osasuna: Errera, Penya (R.Qarsiya, 75), Aridane, D.Qarsiya, Krus, Torro (İbanyes, 86), Monkayola, Qomes (K.Qarsiya, 86), Oros, Budimir (Avila, 70), Abde (Barxa, 75).

Qollar: Rodriqo, 2 (1:0). Torro, 58 (1:1). Rodriqo, 70 (2:1).
Vərəqələr: Monkayola, 21. D.Qarsiya, 37. Militao, 41. Vinisius, 45. Kamavinqa, 75. Barxa, 84. Valverde, 89. Kurtua, 90+4. İbanyes, 90+4 – sarı.
Hakim: Xose Mariya Sançes Martines.
6 may. Sevilya. 55579 tamaşaçı.

Faktlar
* “Real”ın final oyunu üçün meydana çıxan heyətində tarixdə ilk dəfə 10 əcnəbi var idi. Ançelotti start heyətinə yalnız bir ispaniyalını – Daniel Karvaxalı salmışdı.
* “Real” 2014-cü ildən bəri ilk, tarixində isə 20-ci dəfə ölkə kubokunu qazandı. 2014-də “Barselona” 2:1 hesabıyla məğlub edilmişdi.
* 20-ci dəfə ölkə kubokunu qazanan “kral klubu” bu göstəricidə 3-cü yerdədi. “Barselona” kuboka 31, “Atletiko” isə 23 dəfə yiyələnib. “Real” tarixində 40-cı dəfə finalda oynadı. Bu göstəricidə rekord (42) “Barselona”ya məxsusdu.
* Ançelotti “Real”ın “sükanı arxasında” 10-ci titulunu qazandı. İtaliyalı mütəxəssis Madriddə keçirdiyi iki dönəmdə bir dəfə çempionluğu, iki dəfə ölkə kubokunu, bir dəfə İspaniya Superkubokunu, iki dəfə Çempionlar Liqasını, iki dəfə Avropa Superkubokunu və iki dəfə klub dünya çempionatını qazanıb. Ümumiyyətlə, Ançelotti baş məşqi kimi 26 titul qazanıb. Bunlardan 10-u “Real”ın, 8-i “Milan”ın, 3-ü “Bavariya”nın, 3-ü “Çelsi”nin, 1-i “Yuventus”un, 1-i PSJ-nin payına düşür.
* “Real” son 20 finalın 18-də qalib gəlib. Xatırladaq ki, bu statistikda finalın bir oyundan ibarət olduğu turnirlər nəzərə alınır. Madridlilər son finalların yalnız ikisində uduzub: 2018-ci ildə UEFA Superkuboku uğrunda oyunda “Atletiko”ya (2:4), bu il isə İspaniya Superkuboku uğrunda oyunda “Barselona”ya (1:3).
* “Real” tarixində 100-cü qəniməti qazandı. Bu qənimətlərin təsnifatı: 35 çempionluq, 20 ölkə kuboku, 14 Çempionlar Liqası, 12 İspaniya Superkuboku, 5 Avropa Superkuboku, 5 klub dünya çempionatı, 3 qitələrarası kubok, 2 UEFA kuboku, 2 Latın kuboku, 1 Yeva Duarte kuboku, 1 İspaniya Liqa kuboku.
* Benzema “Real”da 25-ci titulunu qazanmaqla bu göstəricidə Marseloya çatdı. Kərim karyerasındakı titulların sayını 33-ə çatdırdı. Qalan 7 tutul “Lion”un, biri isə Fransa yığmasının payına düşür. Benzema Fransa futbol tarixinin ən titullu futbolçusudu.
* “Real” heç bir başqa prezidentin vaxtında Florentino Peresin dövründəki qədər titul qazanmayıb. Peres kluba 2-ci dəfə rəhbərlik edir. Onun birinci dönəmi 2000-ci il iyulun 16-da başlayıb və 2006-cı il fevralın 27-də bitib. İkinci dönəmin əsası 2009-cu il iyunun 1-də qoyulub. Madridlilər Peres dönəmində 32 titul qazanıb. Santyaqo Bernabeu dönəmində (1943-78 aralığı) bu qədər titul əldə olunmuşdu. Milli və beynəlxalq səviyyədə 100 titul qazanan “Real”ın cari mövsümü ÇL-in qalibi kimi bitirmək şansı da qalır.
* “Real” “böyük beşlik” ölkələrində milli kuboku ən azı 20 dəfə qazanan 4-cü komandadı. Rekordçu 31 qələbə ilə “Barselona”dı. 2-ci yerdə “Atletik” (23) gedir. “Bavariya” ilə “Real” hərəyə 20 dəfə kuboku qazanıb.
* “Real” Ançelottinin rəhbərliyi altında 475 gün ərzində 6 titul qazanıb ki, bu da sürətinə görə klub tarixinin rekordudu. Don Karlo baş məşqçi postuna qayıtdığı vaxtdan (2021-in iyunu) bəri madridlilər 6 titula yiyələnib: ötən ilin yanvarında İspaniya Superkuboku, apreldə çempionluq, mayda Çempionlar Liqası, avqustda Avropa Superkuboku, bu ilin fevalında klub dünya çempionluğu, nəhayət, ötən şənbə ölkə kuboku.