İspaniyada mövsümün necə yekunlaşacağı, demək olar, bəllidi.

“Football-plus.az” xəbər verir ki, çempionatda motivasiyasız qalan “Real” artıq 2-ci yeri də əldən vermək üzrədi. “Atletiko” “ağ şimşəklər”i, “Real Sosyedad” isə “hindular”ı izləyir. Elitada qalmaq uğrunda mübarizənin də öz intriqası var. “Elçe” taleyi ilə barışıbsa, aralarında “Sevilya” və “Valensiya” da olmaqla bir neçə komanda xal ehtiyatını artırmağa çalışır.

Turun əsas oyununda “Real” “Vilyarreal”ı qəbul etdi. “Sarı sualtı qayıq” bu dəfə xarakter göstərdi. “Sarılar” kubok oyununda madridlilərin 0:2-ni qələbəyə çevirməsinə imkan vermişdisə, bu oyunun ssenarisi fərqli oldu. “Real” iki dəfə önə çıxdı, amma uduzdu. 16-cı dəqiqədə Asensionun zərbəsindən sonra Torresdən səkən top tora düşdü. “Real” hissənin ortalarından etibarən “yuxuya getdi”, bundan yararlanan Çukvueze hesabı bərabərləşdirdi. Fasilə madridliləri ayıltdı. Oyun canlanan kimi 4 rəqibi arxada qoyan Vinisius yenidən komandasını irəli çıxardı. Ancaq sonra “Real” yenə təşəbbüsü əldən verdi. Morales meydana çıxandan cəmi 3 dəqiqə sonra “status-kvo”nu bərpa etdi, 10 dəqiqə sonra isə Çukvueze dublunu rəsmiləşdirdi. Vaxt olsa da, “Real” heç-heçəni də xilas edə bilmədi. Belə görünür ki, madridlilər çoxdan çempionluqdan əlini üzüb, kubokda və ÇL-də qələbə haqda düşünür.
Paytaxtın digər təmsilçisi – “Atletiko” indi əla formadadı. “Hindular” buna qədər keçirdiyi son 4 oyunda qələbə qazanmışdı. “Rayo Valyekano” ilə oyunun ilk 20 dəqiqəsində qapılar önündə təhlükəli vəziyyət yaranmadı. Ardından qonaqlar elə ilk ciddi hücumda hesabı açdı. Molinanın qolundan 2 dəqiqə sonra isə Ermoso fərqi artırdı. Müdafiəyə çəkilən “Atletiko” bilərəkdən “2-ci nömrə” rolu ilə barışdı. Hərçənd Oblakın qapısı önündə arabir təhlükə yaşanırdı. 62-ci dəqiqədə Lejen meydan sahiblərini azlıqda qoyandan sonra “hindular”ın qələbəsinə şübhə yeri qalmadı. “Rayo” sona yaxın Franın möhtəşəm zərbəsi sayəsində təsəlli qolunu vursa da, bundan artığını bacarmadı. “Atletiko” “Real”la xal fərqini 2-yə endirməkə yanaşı, “Real Sosyedad”dan da 6 xal irəlidədi.

San-Sebastyan klubu da turu inamlı qələbə ilə başa vurdu. İlk yarının son dəqiqələrində dramatik anlar yaşandı. 44-cü dəqiqədə VAR-ın da yardımı ilə “Xetafe”nin qapısına penalti təyin olundu. Ancaq “nöqtə”yə yaxınlaşan Oyarsabal qapıçı ilə dueldə uduzdu. Sadəcə, yarımmüdaiəçi ruhdan düşmədi və uzatma dəqiqələrində günahını qolla yudu. 60-cı dəqiqədə Kubo 2-ci qolu vurdu və bununla da oyunun taleyi həll olundu. “Real Sosyedad” “ÇL zonası”ndakı yerini qorumaqdadı.

Turun ən gözlənilməz nəticələrindən biri Sevilyada qeydə alındı. “Betis” “Kadis”lə oyunun 38-ci dəqiqəsində azlıqda qalandan sonra heç-heçəni qorumağa çalışsa da, mümkün olmadı. Qonaqların 53-cü və 59-cu dəqiqədə vurduğu iki qolun ardından Rubail də meydandan qovuldu. “Betis” avrokuboklara vəsiqə uğrunda mübarizədə ağır zərbə aldı.
“Sevilya” – “Selta” oyununun nəticəsinə də qırmızı vərəqə təsir göstərdi. Sadəcə, bu dəfə əks mənada. Artıq 19-cu dəqiqədə azlıqda qalan meydan sahibləri 81-ci dəqiqədə hesabı 2:0 çatdıranda hər kəs onların qələbə qazanacağındı düşündü. Amma viqolular inanılmaz əzmkarlıq göstərdi. 89-cu dəqiqədə Rodriges fərqi azaltdı. Hakimin 2-ci hissəyə əlavə etdiyi 4 dəqiqənin üçüncüsündə Pasyensiya hesabı bərabərləşdirməklə “Selta”ya böyük sevinc yaşatdı.
Turun qalan oyunlarına gəlincə, “Osasuna” “Elçe”ni evdə, “Atletik” isə “Espanyol”u səfərdə 2:1 hesabıyla məğlub etdi. “Valyadolid” – “Malyorka” oyunu məhsuldar “sülh”lə bitdi. Baş məşqçi postunda Qattuzonu əvəz edən Ruben Baraxa da “Valensiya”nı böhrandan çıxara bilmir. Səfərdə “Almeriya”ya uduzan “yarasalar”ın elitada qalmaq perspektivi gündən-günə azalır. Turun dünən axşam keçirilən son oyununda “Jirona”nı məğlub etməklə xalını 74-ə çatdıran “Barselona” çempionluğa bir addım da yaxınlaşdı???

Turun rəqəmi

12 – “Atletiko”nun çempionatda məğlubiyyətsiz oyunlar seriyası bu həddə çatdı. Simeonenin komandası sonuncu dəfə yanvarın 8-də “Barselona”ya uduzub (0:1) və həmin vaxtdan bəri keçirdiyi oyunların 9-da qələbə qazanıb, 3-də heç-heçə edib.

Turun ulduzu

Samuel Çukvueze (Vilyarreal) – başqa namizəd axtarmağa dəyməz, Madriddə qələbə dublunun dəyəri böyükdü. Özü də nigeriyalı dəfələrlə komandasının köməyinə çatıb, halbuki cəmi 23 yaşı var. Konkret bu oyunda driblinq baxımından Vinisiusu da üstələdi.

Fakt

“Real” “Vilyarreal”a qarşı keçirdiyi son 5 oyunda qələbə qazanmaqdan daha çox uduzub. Madridlilər ölkə çempionatında 2021-ci ildən bəri bu rəqibə qalib gələ bilmir. Həmin ilin mayında qeydə alınan 2:1-dən sonra “Real” iki dəfə qalib gəlib və iki dəfə uduzub. Bütün turnirləri nəzərə alsaq, paytaxt klubu son 5 oyunun yalnız birində - bu il ölkə kubokunun 1/8 finalında qələbəyə (3:2) sevinib.