"Qarabağ"ın son iki oyundakı xal itkisi üzündən Masazır təmsilçiylə lider arasında xal fərqi 7-yə enib. Qələbələri sıralayan "bayquşlar" bu qarşılaşmada uğurlu seriyanı davam etdirməklə Ağdam təmsilçisiylə məsafəni daha da qısaltmağı planlaşdırırdı. "Şamaxı" isə təhlükəli zonada qərarlaşdığından ən azı 1 xala ümid edirdi.

Meydan sahibləri oyuna daha fəal başladı. Qonaqlar "bayquşlar"ın sürətli keçidlərinin qarşısını almaqda çətinlik çəkirdi. 8-ci dəqiqədə Rəhmanın səhvindən sonra topu “oğurlayan” Mikels irəliləyərək Nuriyevi “gördü”, "9” nömrə isə daban ötürməsiylə topu yenidən almaniyalıya qaytardı. O da cərimə meydançasına soxulan Kaşuka məhsuldar ötürmə verdi. "Sabah" qoldan sonra da dominantlığını davam etdirdi. Kaşukun cərimə meydançasına ötürməsinə Mikels yüksəlsə də, topa istədiyi kimi zərbə vura bilmədi. Qonaqların ilk həmləsi zamanı isə Raufun cərimə zərbəsi qeyri-dəqiq alındı. Mikels – Volkov - Nuriyev “üçlüy”ünün təşkil etdiyi hücum zamanı sonuncu hədəfə düşmədi. Kaşukun qapı önünə asmasına yüksələn Mikels topu Volkova ötürsə də, Cəlal özünü zərbənin qarşısına ataraq gürcünün sevinməsinə imkan vermədi. Bir qədər sonra Bəxtiyarın zərbəsi də qeyri-dəqiq oldu. 30-cu dəqiqədə isə Volkov toru silkələdi. Amma referi ofsayd qeydə aldı. İlk hissəyə əlavə olunan dəqiqədə İsayevin fərqlənməsinə Əzizli mane oldu.
Hesabda geri düşən qonaqlar ikinci hissəyə əvəzetmələrlə başladı. Elvinin meydana çıxması mərkəzdə və hücumların təşkilində canlanma yaratdı. Bir qədər sonra Eminin cərimə zərbəsi yumşaq alındı və qapıçı topu tutdu. "Bayquşlar" buna Mikelsin iti bucaq altından zərbəsiylə cavab versə də, qolkiper yerində idi. Elvinin cərimə zərbəsindən sevinməsinə isə dirək mane oldu. Növbəti hücumda Kamran əla ötürməylə Bahaduru zərbə mövqeyinə çıxarsa da, top qapının üstündən keçdi. Qarşı tərəfdən İrasabal da oxşar cəhdlə hədəfə düşə bilmədi. Tellur isə Apehin ötürməsini dəyərləndirə bilmədi. Oyunun sonlarına doğru "şirlər" nə qədər top saxlayıb, rəqibi sıxsa da, kəsərli hücum təşkil edə bilmədi. Uzatma dəqiqələrində isə Ceyhun cərimə meydançasına şığıyan Letiçi “gördü”. Amma fərqin artmasına Əzizli imkan vermədi. Beləliklə, referinin final fiti "Sabah"ın minimalhesablı qələbəsini rəsmləşdirdi.

Gözdən qaçmadı
* Yerli azarkeşlər Coy-Lens Mikelsi "Mikayıl" deyə çağırırdı.
* Şamaxıdan gələn 30-a yaxın azarkeş Masazırda doğma komandanı dəstəkləyirdi.
* Murad Musayev matçboyu emosionallığı, aqressivliyi və rusca nalayiq ifadələrlə yadda qalmaqla yanaşı, hakimə tez-tez narazılığını bildirirdi. Referi baş məşqçiyə nə qədər tolerant yanaşsa da, 87-ci dəqiqədə ilk rəsmi xəbərdarlığını etdi. Amma Musayev sakitləşməyərək emosionallığı və aqressivliyi davam etdirdi. Nəticədə qarşısında ikinci “sarı”nı görməklə meydandan qovuldu. Fərid Hacıyev "Sabah" baş məşqçisinə “qırmızı” göstərəndən sonra rusiyalı mütəxəssis hakimin əlinə vurdu. Bu zaman referinin digər əlindəki sarı vərəqə yerə düşdü.
* Oyun bitəndən sonra Aleksey İsayev qələbəni uşaqlarıyla qeyd etdi. Hətta qazon üzərində uşaq arabasında onu gəzdirdi.
* “Bank Respublika Arena”da təmir və yenidənqurma işlərinin aparılması gözümüzdən qaçmadı.

Maraqlıdı…
“Şamaxı”ya vurduğu qol Aleksey Kaşukun cari mövsüm rəqib qapısından keçirdiyi 15-ci top olub. Yarımmüdafiəçi bununla da Azərbaycan çempionatları tarixində bir mövsümdə ən çox qol vuran ukraynalı futbolçu adına şərik çıxıb. O, Leonid Kalfaya məxsus rekordu təkrarlayıb. “Neftçi”də çıxış edən ukraynalı 1998/99 mövsümündə eyni məhsuldarlıq nümayiş etdirib. Kalfa həmin vaxt 24 oyun keçiribsə, Kaşuk 27-ci matçında 15-ə çatıb. Bir mövsümdə ən çox qol vuran ukraynalı legionerlərin siyahısında rekordçuların ardınca 12 dəfə fərqlənən Viktor Kulikov (“Şəmkir”, 1999/2000) və Vladimir Mazyar (“Simurq”, 2008/09) yer alıb.

ABDULLA İSMAYILOĞLU