Misli premyer-liqasında 33-cü turun matçları keçirilir.

"Football-plus.az" xəbər verir ki, "Turan Tovuz" "Neftçi"ni qəbul edib - 4:0. Oyundan sonra meydan sahiblərinin çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:

- Kubokun yarımfinalında "Neftçi"yə uduzmuşdunuz. Bugünkü qələbə həmin oyundakı uğursuzluğun emosiyası, əsəbi idi, yoxsa necə?
- İki oyunu müqayisə etməzdim. Tam fərqli oyunlar, fərqli yanaşma idi. "Neftçi" həmin oyundakı kimi oynamadı. Bəlkə də, biz finala vəsiqə qazansaydıq, oyunlarımız ağır keçərdi. Futbolçularımda "Neftçi"ni udmaq istəyi daha çox idi. Azarkeşlərimizin qarşısında qalib gəlmək istəyirdik. Xüsusi bir şey yoxdu.

- "Turan Tovuz" bu mövsüm ilk dəfə rəqibinə dörd qol vurur. Bunun "Neftçi" ilə görüşdə reallaşması sizə motivasiya verir?
- Əlbəttə. Bu iki komandanın oyunları həmişə maraqlı və gərgin keçib. Futbolçularımızın hücumda belə aktiv olması, hücumçularımızın qol vurması bizi çox sevindirir. Bu, sezonun əvvəlində istədiyimiz oyun idi. Sadəcə vaxt lazım gəlirdi. Kubokun stressi bizə təsir etdi. Futbolçularım indi daha rahatdı.

- Bu oyun da göstərdi ki, kubokda "Neftçi"ni keçmək olardı. Qəbul edirsiz ki, kubokun yarımfinalında səhvləriniz oldu?
- Yox, qəbul qəbul etmirəm. Heç bir səhv yoxdu. O oyunda nə lazım idi demişdik. Sadəcə futbolçularımız son 15 dəqiqə stress yaşadı. Çox deyirlər ki, komanda çox oturmuşdu arxaya. Buna bizi rəqib məcbur etmişdi. Etdiyimiz dəyişikliklərə baxın. Hücumameyilli futbolçu buraxdıq oyuna. Matçdan sonra müzakirələr normaldı. Oyunu analiz etmişəm. Komandamızın bir az soyuqqanlı olmaması bizə maneçilik törətdi. Rəqibin real epizodu yox idi. İki oyunu da yaxşı oynamışdıq. "Neftçi" də həmin görüşə yaxşı hazırlaşmışdı.

- Runi Eva bu gün 3 qol vurdu və mövsümdəki 15-ci qoluna imza atdı. Onu növbəti mövsüm üçün komandada saxlamaq çətin alınacaq?
- Runi həqiqətən çox artırdı. Hücumçuların çempionatımıza uyğunlaşması çətindi. Amma Runi də öz komandasını tapıb. Qol vurması bizi sevindirir. Səhv etmirəmsə, 5-6-cı turda, "Qarabağ"la oyundan sonra mənə sual vermişdilər ki "Runini nəyə gətirmisiz?". Onda 4-5 qolu var idi. Bu sual mənə qəribə gəlmişdi. Runinin bu gün 15 qolu var. Təbii ki, təklifləri olacaq. O da peşəkardı, qərar verməlidi. Biz də istəyirik onu. İnkişaf istəyiriksə, heyət qorunmalıdır, rəqabət üçün yeniləri də gəlməlidi. Runinin müqaviləsi başa çatır. Hər şeyi zaman göstərəcək.

- Standart vəziyyətlərdən daha çox qol vurursuz. Bunun üçün xüsusi işləyirsiz?
- Həftə ərzində həmişə bunun üzərində çalışırıq. Rəqibin kimliyinin fərqi yoxdu. Roderik Millerin gəlməsindən sonra standartlar üstünlüyümüzə çevrilib. Ötən turda da standart vəziyyətlərdən qollar vurduq. Bu, bizi sevindirir. Rəqiblər də bizə qarşı daha ehtiyatlı hazırlaşacaq.

- Kubokdan sonra iki oyun keçirib, iki qələbə qazanmısız. Kubokdan daha erkən vidalaşsaydınız, turnir cədvəlində fərqli mövqedə olardınız?
- Ola bilərdi. Kubok bizim üçün yük idi. Gələcəyimiz üçün geniş heyətimiz olmalıdır. Bəzi oyunlarda dəyişikliklərdə çətinlik yaşadıq. Özümüz də fikirləşirdik ki, kubok matçından sonra komanda yüngülləşəcək. Görünən də odur. Kubok bizim üçün yük idi.

- Solomon Kvirkeveliya ilə aranızda nə baş vermişdi?
- Neçə gündü ki, bu oyunun mediada ajiotajı var idi. Kubok matçından sonra rəqibin sevincinin videosu çıxmışdı. Biz də, bunu normal qarşılayırdıq. Çalışmışıq ki, azarkeşlərimizi sakitləşdirək. Çünki istəmirik ki, Tovuzda hansısa hadisə baş versin. Hadisəyə gəlincə, elə yerdə oyunçunun gəlib azarkeşlərə əl işarəsi ilə sakit dayanmağı göstərməsi qıcıqlandırıcıdı. Ona normal şəkildə dedim ki, buna ehtiyac yoxdu. Çünki hər şey ola bilər axı. Söhbət bu idi. Ola bilər ki, mən də sərt dedim, o da. Mən müdaxilə etməsəydim, azarkeşlərlə başqa dialoqa girəcəkdi.