Azərbaycan kubokunda yarımfinal mərhələsinin ilk oyunları keçirilib.

“Football-plus.az” xəbər verir ki, “Turan Tovuz” “Neftçi”ni qəbul edib - 1:0. Matçdan sonra meydan sahiblərinin çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:

- Oyundan əvvəl futbolçulara nə demişdiz. Həm meydanda ürəklərini qoydular, həm də qələbə qazandılar...
- Bu il ilk ilimizdi, yarımfinal həyəcanı yaşayırıq. Bunun özü bir motivasiyadı. Futbolçular hiss edirlər ki, final oynaya bilərlər. Futbolçu karyerası qısa olur. Hər oyunçu istəyir ki, nailiyyət əldə etsin. Son oyunlardakı nəticələr, psixoloji duruma görə futbolçularla danışdıq. Onlardakı enerjini görürdüm. Futbolçuların bugünkü istəyi məni təəccübləndirmir.

- İki dəfə final görmüş məşqçisiz. Bu təcrübəniz cavab oyununda nə dərəcədə işinizə yarayacaq?
- Bu gün "Sumqayıt"la "Turan Tovuz"u müqayisə etmək düzgün olmaz. Orada oturuşmuş heyətlə mübarizə aparırdıq. "Qəbələ" ilə ilk finaldan sonra klubun inkişafı göz qabağında idi. Bəlkə də bu da bizə bir təkan verəcək. Futbolçularıma inanıram. Buraya gələndə inanıb gəlmişdim. Bu il qarşımıza qoyulan məqsədə çatmaq istəyirik. Amma rəqibi unutmayaq. "Neftçi" neçə illərdir kubok gözləyir. Gərgin oyun olacaq.

- Qarşıda "Sabah"la çempionat oyunu var. Bu matçda rotasiyalar olacaq?
- Onsuz da futbolçuların bəziləri zədəlidi. Onların sağalmağı sual altındadı. Çempionat da bizim üçün vacibdir. Xalımızı artırmalıyıq. Tam olaraq kuboka köklənib çempionatı unutmaq istəmirik. Futbolçular məsuliyyəti dərk edir. Mübarizə aparacağıq.