Misli premyer-liqasının 17-ci turunda "Turan Tovuz" "Neftçi"yə məğlub olub - 0:1.

Football-plus.az xəbər verir ki, oyundan sonra "boz qurd"un baş məşqçisi Ayxan Abbasov görüş haqda fikirlərini səsləndirib:

"Yenə şəhidimiz var. “Neftçi”nin əməkdaşı da dünyasını dəyişib. Çox üzücüdür. Allah rəhmət eləsin!
Azarkeşlərimizə təşəkkür edirəm. Bəlkə də, ən yaxşı oyunumuzu oynadıq. Getdikcə inkişafı görürdük. Təəssüf ki, oyunu xalsız başa vurduq. Futbolçularıma təşəkkür edirəm. Qarşıda kubokda çətin matçımız var. Ona hazırlaşacağıq. İtkilərimiz var. Bir şey fikirləşib, tam hazır olmağa çalışacağıq".

- Məğlubiyyətin səbəbi nə oldu?
- “Neftçi” təcrübəli komandadı. Penaltidən qol buraxdıq. Bu gün VAR dəqiq baxır. Hətta yıxılanda belə əlini qoymalısan. Bununla ikinci dəfə qarşılaşırıq. Daha diqqətli olmalıyıq. Belə oyunlar olur. Əsas odu ki, gələcək matçlar üçün işıq görünür. Daha yaxşı ola bilərik.

- Komandanız çoxlu qol imkanından yararlana bilmədi...
- Qalib gəlmək istəyirsənsə, epizodları dəyərləndirməlisən. Xüsusən, “Neftçi” kimi komandaya qarşı. Rəqibin müdafiəsini yara bilirdik. Sadəcə, son nöqtəni qoymaq çatmadı. Futbolda bu şeylər də olur.

- Kubokda yenidən “Neftçi” ilə qarşılaşmaq ehtimalınız var...
- Gərək biz keçək, “Neftçi” keçsin, Qismətdi. Bu dəqiqə rəqib barədə çox düşünmürük. Əsas “Kəpəz”lə matçdı. Bir az üstünlüyümüz var. Maraqlı oyun olacaq.