"Rəqiblərin necə çıxış edəcəyi bizi narahat etmir"
Misli premyer-liqasında 33-cü tura start verilib.
"Football-plus.az" xəbər verir ki, "Kəpəz" "Sabah"ı qəbul edib - 0:3. Oyundan sonra qonaqların məşqçisi Artur Oleninin mətbuat konfransı keçirilib. Sizi mütəxəssisin fikirləri ilə tanış edirik:
"Bu gün hər iki komanda yaxşı oyun nümayiş etdirdi. "Kəpəz" yaxşı komandadı. Amma biz onlara imkan vermədik ki, müsbət nəticə əldə etsinlər. Futbolçuların oyununa "əhsən" deyirik. Onlardan məmnunuq. İkinci yeri təmin etməyimizə baxmayaraq yaxşı motivasiya ilə oynadılar".
- 2:0-dan sonra komanda bir az arxayınlaşdı. Bununla razısız?
- Sizinlə razı deyiləm. Düzdü, oyun üstünlüyünü əldən vermişdik. Amma dəyişikliklər etdikdən sonra üstünlük bizim tərəfimizə keçdi. Meydana daxil olan futbolçular yaxşı çıxış etdilər.
- "Qarabağ" - "Qəbələ" matçı sizin üçün nə dərəcədə önəmlidi?
- Bizim üçün daha çox öz oyunlarımız önəmlidi. Rəqiblərin necə çıxış edəcəyi bizi narahat etmir.
- Bu gün qapıda Nicat Mehbalıyevə şans verdiniz. Qapıçı dəyişikliyinin səbəbi nə idi?
- İmkan olduqca bütün oyunçulara şans veririk.
- Onun oyununu necə dəyərləndirirsiz?
- Onun oyunundan məmnunuq. Çox inamlı çıxış etdi. Matç ərzində 2-3 dəfə seyvləri oldu.
- İndiki dönəmdə "Beşiktaş"la yoldaşlıq oyunu keçirmək planlarınıza nə dərəcədə uyğun gəlir?
- Bizi "Beşiktaş"ın özü motivasiya edir. Çempionat sona yaxınlaşır. Çalışacağıq ki, bu matçda ən yaxşısını edək.
Digər xəbərlər
