Misli premyer-liqasının 32-ci turunun “Qəbələ” – “Səbail” görüşü meydan sahiblərinin 4:2 hesablı qələbəsiylə bitdi.

“Football-plus.az” saytının məlumatına görə, bu oyunda da idarəçiliklə bağlı qüsurlar diqqəti çəkdi. Rauf Allahverdiyevin qərarları heç də birmənalı qarşılanmadı.

İlk hissəyə cəmi 1 dəqiqə əlavə olunması anlaşılmadı. Halbu ki həm qol vurulmuş, həm də əvəzetmə olmuşdu. Fasilədən sonra isə ən yaddaqalan epizod 71-ci dəqiqəyə təsadüf etdi. Hakim "Qəbələ"nin qapısına penalti təyin etdi. Lakin VAR otağından epizodun mübahisəli olması ilə bağlı xəbər gəldi. Və referi monitora yaxınlaşandan sonra qərarını dəyişdi. Ədalət təmsilçisi 90 dəqiqə ərzində cəmi 2 dəfə əlini cibinə atdı və göstərdiyi vərəqələr haqlı idi. İkinci hissədə dayanmalar, əvəzetmələr, qolların vurulması, həmçinin VAR-da dəqiqləşməni nəzərə alsaq, oyuna cəmi 4 dəqiqə əlavə olunması düzgün deyildi. Çünki təkcə VAR-a müraciət 2 dəqiqə çəkdi. Bu üzdən ən azı 6-7 dəqiqə əlavə olunmalıydı.

ABDULLA İSMAYILOĞLU