Misli premyer-liqasında daha bir tur geridə qaldı. 21-ci oyun həftəsində hakimlik barədə nə söyləmək olar?

Football-plus.az xəbər verir ki, ədalət təmsilçiləri idarə etdikləri matçlarda nəticəyə təsir edən səhvlərə yol verməsələr də, yenə narazılıq yaşandı. Şamaxıda keçirilən qarşılaşmada texniki səbəbdən VAR-dan istifadə olunmamasını da xüsusi qeyd etmək lazımdı.

Neftçi – Sumqayıt, ELÇİN MƏSİYEV

Oyunsonrası mətbuat konfransında qonaqların baş məşqçisi Samir Abasov hakimlikdən narazı qaldığını bildirsə də, Elçin Məsiyevin nəticəyə təsir edən səhvə yol vermədiyini vurğulamaq lazımdı. “Kimyaçılar”ın çalışdırıcısı əmin olmasa da, xüsusilə ikinci qolda rəqibin forvardı Mateus Saldanyanın Elvin Bədəlova qarşı kobud oynadığını söylədi. Ancaq epizodun təkrarına baxdıqda bir daha görünür ki, braziliyalı forvard qaydalar çərçivəsində mübarizə apararaq Bədəlovu səhvə məcbur edir. Təbii ki, Məsiyevin idarəçiliyi ideal deyildi. Xüsusilə laysmanlarla anlaşma baxımından. Köməkçilərdən söz düşmüşkən, Rəhman İmami qarşısında baş verən qayda pozuntusuna reaksiya vermək əvəzinə baş hakimin hansı qərar verəcəyini gözləyirdi. Laysman bir çox hallarda autu da kimin atacağına Məsiyevin qərar verməsinə bel bağlayırdı.

Şamaxı – Turan Tovuz, ƏLİYAR AĞAYEV

Şamaxıda keçirilən matçda VAR işləmirdi. Bu üzdən Əliyar Ağayevin rəhbərlik etdiyi hakimlər briqadasının işinin çətinləşəcəyini düşünmək olardı. Ancaq FİFA referisinin bəxtindən 90 dəqiqə ərzində mübahisəli vəziyyət yaşanmadı. İdarəçiliyə gəlincə, Ağayev çətinlik çəkmədən işinin öhdəsindən gəldi. Daim hadisələrin mərkəzinə yaxın olan ədalət təmsilçisinin gözündən heç nə yayınmırdı. Rəhman Daşdəmirovun “sarı” aldığı epizodda hakim oyuna davam etsə də, pauza yaranan kimi futbolçunu yanına çağırıb bir qədər əvvəl yol verdiyi kobudluğa görə “mükafatlandırdı”.

Kəpəz - Qarabağ, RAUF CABBAROV

Oyun sürətli və gərgin keçdi. Rauf Cabbarov ilk hissədə "Qarabağ"ın qapısına penalti təyin etdi. Lakin VAR hakimi Cavid Cəlilovun xəbərdarlığı ilə epizodu incələməyə getdi. Təkrara baxandan sonra isə penalti qərarını ləğv etdi. Həmin vəziyyətdə Şuaybunun qolunun Medinadan öndə olduğu görünür. Lakin görüntü aydın deyil. Hakimlər nigeriyalının çiyninin ofsayda düşdüyünü əsas gətirərək penaltini ləğv etdi. Ən azı bu qərar olduqca şübhə doğurur. Bundan başqa, ilk hissəyə 2 dəqiqə əlavə olundu ki, bu da yetərincə az idi. Çünki təkcə penalti epizodu azı 5 dəqiqə vaxt apardı. Rauf Cabarov və rəhbərlik etdiyi briqadanın verdiyi qalan qərarlar isə doğru idi.

Zirə - Qəbələ, KAMAL UMUDLU

Qolun ilk dəqiqələrdə vurulması oyunda aqressivliyi artırdı. Rövlan Muradov 2-3 epizodda olduqca sərt oynasa da, Kamal Umudlu ona xəbərdarlıq etməklə kifayətləndi. "Qəbələ"nin qapısına təyin olunan penalti qərarı doğru idi. Lakin 33-cü dəqiqədə Çantakiasla Abu Akala sarı vərəqə göstərilməsi bir az qəribə göründü. Çünki epizodda nəyin baş verdiyi dəqiq bilinmədi. Ümumiyyətlə, hakimlə köməkçiləri arasında əlaqədə problem var idi. Bir epizodda Umudlu həkimlərin meydana girməsini istəsə də, 4-cü hakim funksiyasını yerinə yetirən Kamrambəy Rəhimov bunun icazəsiz olduğunu bildirərək "Zirə" düşərgəsinə xəbərdarlıq etdi.

Sabah – Səbail, İNQİLAB MƏMMƏDOV

İnqilab Məmmədov idarə etdiyi 90 dəqiqə ərzində sürətli, yaradıcı və məhsuldar matç izlədik. Referi maksimum çalışdı ki, temp aşağı düşməsin və azarkeşlər gözəl futboldan zövq alsın. 68-ci dəqiqədə "Sabah"ın futbolçusu Con İrasabala "dənizçilər"in hücumçusu Qoba Zakpaya qarşı kobudluğa görə qırmızı vərəqə verdi. 78-ci dəqiqədə "Səbail"in kapitanı Rahid Əmirquliyevə də Emmanuel Apehə qarşı kobudluğa görə 2-ci “sarı” göstərməklə vaxtından əvvəl paltardəyişmə otağına yolladı. Referinin bu qərarları haqlı idi.

RƏŞAD