Dünən Türkiyə yığmasının növbəti - ardıcıl 5-ci dünya çempionatında iştirak etməyəcəyi dəqiqləşdi.

DÇ-2022-nin pley-offu çərçivəsində qardaş ölkə dünən səfərdə Portuqaliyaya Portuqaliyaya 1:3 hesabı ilə məğlub oldu. Matçın antiqəhrəmanı ''ay-ulduzlular''ın kapitanı Burak Yılmaz oldu. Görüşün 85-ci dəqiqəsində Enes Ünala qarşı kobudluqdan sonra qazanılan penalti zamanı Burak məsuliyyəti üzərinə götürdü. Həmin an hesab 2:1 idi və Türkiyə bərabərlik qolunu vurmaq üçün gözəl, hətta tarixi fürsət yaxalanmışdı. Amma 36 yaşlı forvard heç ''çərçivə''yə belə düşə bilməyərək topu qapının üstündən vurdu! Final fitindən sonra göz yaşlarını saxlaya bilməyən Burakı komanda yoldaşları sakitləşdirdi.

Təcrübəli forvardın bu şansı qaçırmasını sürpriz saymaq olar. Çünki Burak istər klub, istər yığma səviyyəsində yerinə yetirdiyi son 17 penaltinin hamısını qola çevirmişdi! Amma diqqət çəkən məqam odu ki, Yılmaz yığma karyerasında 7 penaltidən 3-nü boşa verib. Oyunsonrası mətbuat konfransında penaltini qaçırdığına görə üzr istəyən Burak həm də yığma karyerasını bitirdiyini açıqladı. Beləliklə, bu futbolçunun 2006-cı ilin aprelində Azərbaycana qarşı oyunla başlayan yığma karyerası 77-ci qarşılaşmadan sonra olduqca dramatik bir şəkildə başa çatdı. Burak bu 77 oyunda 31 qol, 8 məhsuldar ötürmə ilə fərqləndi. Yılmaz aktivində 51 qol olan Hakan Şükürdən sonra Türkiyə yığması tarixinin ən məhsuldar ikinci oyunçusu statusundadı.