Türkiyə Futbol Federasiyasının (TFF) yeni prezidenti Mehmet Büyükekşinin yığmanın baş məşqçisi Ştefan Kuntsla bağlı yeni planlarının olduğu üzə çıxıb.

''Ajansspor'' saytının iddiasına inansaq, federasiya rəhbəri qarşıdakı günlərdə almaniyalı mütəxəssislə görüşərək ona yeni tələblərini irəli sürəcək. Birinci tələb ondan ibarət olacaq ki, Kunts bundan sonra müqavilə müddəti davam etdiyi müddətdə Türkiyədə yaşamalıdı!

Məlum olduğu kimi, 60 yaşlı mütəxəssis öz vətəni Almaniyada yaşayır və Türkiyəyə yalnız yığmanın oyunları zamanı gəlir. ''Ay-ulduzlular''ı daha öncə çalışdırmış əcnəbi mütəxəssislərdən Quus Hiddinklə də buna bənzər problem yaşanmışdı. İkinci tələb isə maaş məsələsində olacaq. Büyükekşi Kuntsa illik məvacibinin avro ilə yox, lirə ilə ödənilməsini təklif edəcək. Bu mütəxəssisin illik maaşının 1,5 milyon avro (təxminən 262 milyon lirə) olduğunu bildirək. Xəbərdə o da qeyd olunub ki, Kunts bu təkliflərin hətta birini rədd edəcəyi təqdirdə onunla yollar ayrılacaq! Almaniyalının TFF ilə 2024-cü il iyunun 30-na qədər müqaviləsi var.

Bundan başqa, əvvəlki rəhbərliyin dönəmində həm TFF-nin İcraiyyə Komitəsinin üzvü, həm də yığmaya cavabdeh yönetici kimi çalışan Həmit Altıntopla da bağlı qeyri-müəyyənlik var. Həmit hazırda yığmaya cavabdeh yönətici olsa da, İcraiyyə Komitəsinə daxil deyil. Federasiyadakı seçkidən öncə güman olunurdu ki, yeni dönəmdə onunla peşəkar müqavilə imzalanacaq. Məsələn, əvvəlki illərdə yığmaya cavabdeh yönətici vəzifəsini icra edən Cüneyt Tanmanla peşəkar müqavilə imzalanmışdı və o, qurumdan maaş alırdı. Şaiyələrə inansaq, Altıntop da bu cür müqavilə və aylıq 500 min lirə (28500 avro) tələb edir. Amma Büyükekşi bu günə qədər onun tələbini yerinə yetirməyib.

Xatırladaq ki, Kuntsun Türkiyə yığmasının başına gətirilməsində məhz Həmit Altıntop böyük rol oynayıb. Qardaş ölkə bu məşqçinin başçılığı altında DÇ-2022-yə vəsiqə qazana bilmədi. Millətlər Liqasında isə komanda o qədər də güclü olmayan rəqiblərin yer aldığı qrupda 4 oyunun hamısında qol buraxmadan qalib gəlib. Ümumilikdə Türkiyə Kuntsun başçılığı altında keçirdiyi 12 oyundan 9 qələbə, 1 heç-heçə, 2 məğlubiyyətlə ayrılıb.