Noyabrın 16-da yoldaşlıq oyununda Şotlandiyadan üstün olan Türkiyə bu gün növbəti oyununa çıxacaq.

Football-plus.az xəbər verir ki, qardaş ölkənin komandası Qaziantepdə Çexiya ilə qarşılaşacaq. Məhşur hakim Cüneyt Çakır matçın ilk 5 dəqiqəsində oyunu idarə etməklə hakimlik karyerası ilə vidalaşacaq.

Bu arada dünən bu oyuna həsr olunmuş mətbuat konfransında kuryoz hadisə baş verdi. Gənc müdafiəçi Samet Akaydın ilə birlikdə mətbuat konfransına çıxan Türkiyənin baş məşqçisi Ştefan Kunts birdən oturduğu stuldan yıxılmaq təhlükəsi yaşadı. O əli ilə yerdən tutaraq son anda yıxılmaqdan qurtuldu. Ayağa qalxarkən isə almaniyalı mütəxəssisin ağzından refleks olaraq türk dilində söyüş çıxdı! Yanlışlığa yol verdiyini anlayan Kunts məsələni gülüş ilə ört-basdır etməyə çalışdı. Onun türk dilində söyüş söyməsi jurnalistlərin və Samet Akaydının da gülüşməsinə səbəb oldu. Kuntsun bu olayın ardından ingilis dilində zarafatca ''bu anı geri çəkmək mümkündümü'' deyə soruşması diqqət çəkdi.