''Qalatasaray'' dünən Türkiyə çempionatının 27-ci turunda ''Adana Dəmirspor''u çətinliklə də olsa, 2:0 hesabı ilə yendi.

"Football-plus.az" xəbər verir ki, ''Cim-Bom''un ulduzu Mauro İkardinin hərəkəti diqqət çəkdi. Ölkəmizdə bəziləri tərəfindən ''Qarabağ''dan daha çox sevilən argentinalı forvard 83-cü dəqiqədə Bafetimbi Qomislə əvəzləndi. Həmin an hesab hələ açılmamışdı. İkardi əvəzləndikdən sonra birbaşa paltardəyişmə otağına yollandı. Final fitindən sonra meydanda qələbəni qeyd edən ''Qalatasaray''lılar arasında İkardi yox idi. Onun paltardəyişmə otağından sonra komandanın avtobusuna yollandığı məlum oldu. Bu, cari mövsüm ikinci bənzər hadisədi. İkardi daha öncə 19-cu turda ''Hatayspor''la ev oyununda da qələbəni qeyd etməmişdi. Komandasının 4:0 hesabı ilə qalib gəldiyi oyunda 90 dəqiqə meydanda olan və qol vurmayan 30 yaşlı futbolçu final fitindən sonra birbaşa paltardəyişmə otağına yollanmışdı.