Türkiyədə son dönəmlərin ən populyar pop müğənnilərindən olan Simgə Sağın yenidən adından söz etdirməyi bacarıb.

“Football-plus.az” xəbər verir ki, ötən ildən bəri “Aşkın olayım” mahnısı ilə populyarlaşan, qardaş ölkədə futbolsevərləri və tribunaları coşduran müğənninin səsi bu dəfə İspaniyadan, daha doğrusu, Kataloniyadan gəlib.

Belə ki, onun yeni mahnısının tanıtımı dünyaca ünlü “Nou Kamp” stadionunda baş tutub. Hadisə bazar ertəsi baş verib.

Həmin gün, bilindiyi kimi, La Liqanın 28-ci turunun son matçında – Kataloniya derbisində “Barselona” “Jirona” ilə qarşılaşıb. Qolsuz başa çatan oyunun gedişində Simgənin şəkili, eləcə də yeni mahnısı “Harcandıkça”nın adı “Nou Kamp”dakı reklam lövhələrində və nəhəng ekranda yer alıb.

Sənətçi özü də Barselonaya gedərək stadionun VİP-lojasından oyunu canlı izləyib. “Nou Kamp”da yer alan ilk türkiyəli sənətçi olmağın qürurunu yaşayan Simgə stadionun önündə və içində çəkdirdiyi şəkilləri sosial şəbəkədə paylaşaraq bunları yazıb: “Barselona”nın “Spotifay” ilə işbirliyinə əsasən öz stadionunda bir sənətçiyə yer verməsi və bunu ən birinci mənim həyata keçirməyim məni çox sevindirdi. Oyunu da böyük maraqla izlədim. Daim mənim yanımda olan köməkçilərimə və kollektivimə təşəkkür edirəm”.

“Harcandıkça” adlı yeni mahnı “yutub”da 13 gün ərzində artıq 5 milyona yaxın baxış toplayıb. Qeyd edək ki, Simgənin “Aşkın olayım”, “Öpücem”, “Üzülmedin Mi” kimi məşhur mahnılarının yer aldığı “Ben Bazen” adlı albom “Spotifay” tarixində “ən çox dinlənilən türkiyəli qadın sənətçi albomu” adını qazanmışdı. “Aşkın olayım” mahnısı isə bu platformada 100 milyondan çox dinlənilmişdi.

Əslində 2011-ci ildən bu sənətdə olan 41 yaşlı Simgə ötən il populyarlıq qazanmağa başladı və buna görə də ilk növbədə “Qalatasaray”lı Mauro İkardiyə minnətdar olmalıdı. Ünlü argentinali forvard Türkiyəyə ayaq basandan sonra “Aşkın olayım” mahnısını bəyənərək paylaşmış, daha sonra onlar Simgə ilə bir-birini təqib etməyə başlamışdılar. Ardından “Qalatasaray” İkardiyə jest edərək onun “NEF Stadionu”nda vurduğu hər qoldan sonra bu mahnını səsləndirmişdi.