Çoxları düşünürdü ki, Mahmud Qurbanovlu "Səbail" mövsümə iddialı başlayacaq və ilk "5-lik" uğrunda mübarizə aparacaq.

Amma "dənizçilər" uğursuz start götürdü. Bunun nəticəsidi ki, geridə qalan 16 turdan sonra komanda 2 qələbə, 4 heç-heçə və 10 yenilgiylə turnir cədvəlinin 8-ci pilləsində qərarlaşıb. Futbolun yazılmamış qanunları, sürprizləri çoxdu və bu cəhətlər bizim çempionatı da "bəzəyir". Nə qədər uğursuz çıxış etsə də, “Səbail” çempionatda "Sabah" kimi güclü rəqibi büdrədən üç klubdan biridi. Mahmud Qurbanov kubokda da "bayquşlar"ı boğmaq istəyirdi. Elə matç da futbolumuzun "professor"unun istədiyi kimi başladı. Əvvəlcə "Sabah"ın qolkiperi qırmızı vərəqə aldı, sonra "dənizçilər" təzyiqi artırdı. Bunun nəticəsi kimi meydan sahibləri qol vurdu. Amma hakim ofsayd qeydə aldı. Bir qədər sonra Kizito qarşısıalınmaz zərbəylə hesabı açdı. Heç kimin, o cümlədən cənab "professor"un belə gözləmədiyi halda "Səbail" fasiləyə üstün yollandı. Fasilədən sonra Mahmud Qurbanov və yetirmələri meydana iştahlı çıxaraq, daha iki dəfə rəqibi məyus etdi. Amma tezliklə də dayandılar.

Bundan istifadə edən rusiyalı mütəxəssis Brest qalasının müdafiəçiləri almanların üzərinə şığıdığı kimi "dənizçilər"in üzərinə yeriyib təslim olmayacağını göstərdi. Murad Musayevin Kristian Sebalyosu “döyüşə atması” Mahmud Qurbanov və donanmasının geriyə çəkilməsiylə nəticələndi. Təslim olmağı rədd edən "bayquşlar" ispaniyalının sayəsində "dənizçilər"in caynağından qurtuldu. Belə ki, "11 nömrə" həm sarsıcıdı zərbəylə rəqibi məyus etdi, həm də paxıllıq etməyərək komanda yoldaşı Volkovun da sevinməsinə şərait yaratdı. Qısası, Sebalyos həm "Səbail"ə yaşıl meydanda "Muduey döyüşü" yaşatdı, həm də Mahmud Qurbanovun iştahını korladı.

İspaniyalı bununla göstərdi ki, futbola daha çox acdı və özünü göstərmək üçün alışıb-yanır. Bu ehtirasının səbəblərindən biri də onun 3-cü turda zədələnərək 6 oyun kənarda qalmasıdı. Bundan başqa, Sebalyos ötən mövsümdə 10 oyunda şans qazanıb, 2 qol vurmuşdusa, cari “futbol ili”ndə (kubok matçı da daxil) 12 qaşılaşmada meydan olmaqla 2 qol və assitləriylə yadda qalıb. Odu ki, ispaniyalı Murad Musayevin rəğbətini qazanmaq naminə həm komanda daxilində Mikels, Kaşuk, Apeh, Ələskərov kimi qolçularla rəqabətə girir, həm də meydanda əla performans sərgiləmək üçün çarpışır. Bir sözlə, Sebalyos kubok matçında rusiyalı mütəxəssisin sehirli silahı, komandasının xilaskarı, "Səbail"in Əzrayılı oldu, Mahmud Qurbanovun boğazında tikana çevrildi.

P.S. "Dənizçilər"lə "bayquşlar"ın qarşıdurmasında hər iki baş məşqçinin sərkərdəlik keyfiyyətləri də üzə çıxdı. Rusiyalı Murad Brest qalasının qəhrəmanı, mayor Pyotr Qavrilov kimi əks-hücuma atılıb düşməni geri oturtduğu halda, Mahmud Qurbanovun "professorluğ"u "pirr qələbəsi"nə bəs etdi...
P.P.S. Gəncəli Mahmud Qurbanov futbolumuzun "professor"u, ən çox çempion olan futbolçusu adına yiyələnə bilər. Amma o nə Gəncənin Cavad xan kimi döyüşəkən sərkərdədi, nə də "Hababam sinfi"ndəki Mahmud Hocadı ki, idarəçilikdə səriştəli olsun. Odu ki, hörmətli "7 nömrə", getmək vaxtıdı...