...Kaşuk 7-ci dəqiqədə hesabı açandan sonra "Sabah"ın işinin asan olacağını, "Şamaxı" üzərində çətinlik çəkmədən qələbə qazanacağını düşünmək olardı. Amma autsayder erkən qoldan sınmadı, əksinə, güclü rəqibinə çətin anlar yaşatdı. Elitada qalmaq uğrunda mübarizə aparan bölgə təmsilçisinin dirənişi Murad Musayevi də özündən çıxardı. Hakimin, demək olar ki, hər qərarına çılğın reaksiya verən mütəxəssis sonda meydandan qovuldu. Özü də haqlı olaraq.

İdeal hakimlik, idarəçilik yoxdu. Dünən də meydanda müəyyən qüsurlar, xırda səhvlər var idi. Fərid Hacıyev həqiqətən fitinə çox güc verdi. Nəticəyə təsir edən səhvini isə görmədik. Belə olan halda Murad Musayevin özündən çıxması, hətta adi bir epizodu köməkçisinin belinə tullanmaqla hakimə göstərməyə çalışması qətiyyən xoş qarşılana bilməz. Necə ki, bunu onun hakimlikdən daha çox əziyyət çəkən digər həmkarlarından görməmişik. Bu hərəkət nə "Sabah" kimi iddialı, peşəkarlaşma yolunda önəmli işlər görən bir kluba, nə də onun baş məşqçisinə yaraşır.

Amma onu da unutmayaq ki, bu nə birinci, nə ikinci, nə də üçüncü belə haldı. Heç sonuncu olacağını da gözləməyə dəyməz. Çünki Murad Musayev dayanana, sakitləşənə oxşamır. Adamın gördüyü işə, "Sabah"ı yeni müstəviyə, "Qarabağ"ın hegemonluğu fonunda bozaran premyer-liqaya rəng, hiss-həyəcan qatmasına söz yoxdu. Buna görə istənilən tərifi haqq edir. Amma...

...Murad Musayev klubun imicini də düşünmək məcburiyyətindədi. Rəhbərliyin gördüyü müsbət işlərə dəyər verməlidi. Onun çılğın davranışları qeyd olunanlarla qətiyyən uzlaşmır. Adam meydanda 90 dəqiqə savaşan futbolçuları belə arxada qoyub, premyer-liqanın ən çox qırmızı vərəqə alan simasıdı. Bəlkə də bu gedişlə dünya rekordu müəyyənləşdirəcək. Əslində gecdi, amma ziyanın yarısından qayıtmaq da xeyirdi. Murad Musayevi durdurun!

KƏNAN HƏSƏNOV