Azərbaycan premyer-liqasının 2021/22 mövsümü başa çatmaq üzrədi.

Artıq sona 2 tur qalıb. Demək olar ki, mövsümlə bağlı çox şeyə aydınlıq gəlib. “Qarabağ” çempionluğu, “Neftçi” isə gümüş medalları təmin edib. Dəqiqləşməyən iki məqam var: bürünc medalların sahibi və avrokuboklara vəsiqə qazanan 4-cü klubun kimliyi. Hər iki yer uğrunda 3 komanda arasında gərgin mübarizə gedir. “Zirə”, “Qəbələ” və “Sabah” iddiaçılardı. Elə isə kimin daha şanslı olduğunu araşdıraq.

Ən şanslı “Zirə”di
Rəşad Sadıqovun komandası cari mövsümə iddialı başlasa da, sonradan bəzi çatışmayan nüanslar oldu. Buna baxmayaraq, “Zirə” bu mübarizədə daha şanslıdı. Gəlin bunu əyani şəkildə izah edək. “Qartallar”in qarşıda 2 oyunu var. 27-ci turda “Neftçi”, son həftədə isə “Şamaxı” rəqib olacaq. “Zirə” bu iki görüşdə 2 xal qazansa, avrokuboklara vəsiqəni təmin edəcək. Nə üçün “Zirə” əsas namizəddi? Rəşad Sadıqovun komandası son 2 matçı doğma meydanda keçirəcək. “Neftçi” ilə görüşdə büdrəsə də, “Şamaxı”nı doğma meydanda məğlub edə biləcək potensialdadı. Bundan əlavə, qəsəbə təmsilçisi Azərbaycan kubokunun finalında “Qarabağ”la qarşılaşacaq. Nə qədər gözlənilməz olsa da, “Zirə” bu görüşdə qələbə qazana bilər. Bunun sayəsində Konfrans Liqasında mübarizə apara bilər. Göründüyü kimi, “Zirə” qarşıdakı 3 görüşdən yalnız 1-də qələbə qazansa, missiyasını yerinə yetirəcək. Əsas rəqiblərin son turda bir-biri ilə qarşılaşacağını da nəzərə alsaq, “qartallar”ın bu işin öhdəsindən gələcəyinə inam böyükdü.

Ən rahat təqvim “Qəbələ”dədi
Elmar Baxşıyevin komandası ardıcıl məğlubiyyətlərdən sonra özünə gəlməyi bacardı. “Qırmızı-qaralar” son 2 görüşdə iddialı rəqibləri üstələdi. Doğma meydanda “Neftçi” üzərində qələbə gözlənilən idisə, səfərdə “Zirə”nin qapısından 3 cavabsız topun keçirilməsi sürpriz oldu. Məhz bu nəticələr “qırmızı-qaralar”ın mövsüm ərzindəki əziyyətinin nəticə verməsinə səbəb ola bilər. Belə ki, “Qəbələ” bu həftə “Şamaxı”nın qonağı olacaq. Elmar Baxşıyevin komandası bu görüşdə mütləq qələbə qazanmalıdı. Bu, “radarlar” üçün minimum hədəfdi. Bölgə təmsilçisi son turda isə əsas rəqibi “Sabah”la görüşəcək. Təbii ki, bu qarşılaşmada meydan sahiblərinin əsas üstünlüyü azarkeş amili olacaq. “Qəbələ”nin 2 xal öndə olması da Baxşıyevin işini asanlaşdırır. “Qırmızı-qaralar” son görüşdə heç-heçə etsə də, avrokuboklara vəsiqə qazanacaq. Dediyimiz kimi, bunun üçün “Şamaxı”nı səfərdə məğlub etmək vacibdi.

“Sabah”ın işi çətin görünür
Hazırda ən pis durumda olan “Sabah”dı. Murad Musayevin rəhbərliyi altında özünü yaxşı tərəfdən göstərən komanda, təbii ki, mövsümün əvvəlindəki uğursuzluğun əziyyətini çəkir. “Bayquşlar”ın avrokubok xəyalı özündən daha çox rəqiblərindən asılıdı. Bu tur “Sumqayıt”ı qonaq edəcək komanda növbəti həftə Qəbələ səfərinə çıxacaq. Bölgə təmsilçisi bu yolda bakılıların əsas rəqibidi. Musayevin komandası “kimyaçılar”ı əliboş yola salandan sonra “Qəbələ” səddini də keçməlidi. Yalnız belədə “tələbələr” tarixində ilk dəfə avrokubok həyəcanı yaşaya biləcək.
Görünən budu ki, qarşıdakı 2 turda bizi maraqlı mübarizə gözləyir. İstənilən halda hər şey komandaların özündən asılıdı. Amma ümumi mənzərəyə nəzər yetirərək, avrokuboklara vəsiqə qazanmaq şansını belə müəyyənləşdirmək olar:

“Zirə” – 50 faiz
“Qəbələ” - 30 faiz
“Sabah” – 20 faiz

Sonda bunu da qeyd edək ki, komandaların uğurları futbolçuların çıxışından və dözümlülüyündən asılıdı. Sözsüz, bu məsələdə “Sabah” daha üstündü. “Bayquşlar”ın yetərincə geniş və güclü heyəti var. Murad Musayevin gəlişindən sonra komandanın yüksəlişi aşkar hiss olunur. Zədə amili də nəticələrə təsir edə bilər. Hər üç komandanın heyətində vacib oyunçuların sıradan çıxması qaçılmazdı. Bundan ən çox əziyyət çəkən isə “Qəbələ”di. Bölgə klubu mövsüm ərzində, demək olar, tam heyətlə oyunlarda iştirak edə bilməyib.

Hakim qərarlarını da unutmaq olmaz. Referilər səhv qərarlarla nəticəyə təsir edə bilər. Buna mövsüm ərzində dəfələrlə şahid olmuşuq. Komandaları narahat edən məqamlardan biri də məhz budu.

İLKİN SULTANLI