Turun mərkəzi oyunu Zirədə keçirilsə də, həftəsonunun sürpriz nəticəsi Masazırda qeydə alındı.

Demək olar ki, hamı matçın favoriti kimi meydan sahiblərini görürdü. Cari mövsümdə Murad Musayevin yetirmələrinın passivində yalnız bir məğlubiyyət var idi. Öz meydanında isə “bayquşlar” heç kimə boyun əyməmişdi. Lakin tovuzlular bu statistikanı dəyişməyə nail oldu.

İlk qol “Sabah”ın müdafiəçilərinin kobud səhvindən sonra vuruldu. Arxa xətt oyunçularının “yatmasından “ istifadə edən Oduva Yusiflə təkbətək çıxaraq hesabı açdı. İlk qolda Ayxanın ideal ötürməsini də xüsusi qeyd etmək lazımdı. Məhz o meydanın dərinliyindən verdiyi ara ötürməsi ilə ingiltərəli futbolçunu qolkiperlə duelə göndərdi. Matçın sonrakı axarı göstərdi ki, qonaqların ilk qolu heç də təsadüf nəticəsində vurulmayıb. 35-ci dəqiqədə “boz qurdlar” hesab arasındakı fərqi artıra bilərdi. Elvin Camalov Oduvanın zərbəsinin qarşısını əli ilə kəsdi ki, hakim haqlı olaraq penalti nöqtəsini göstərdi. Yeri gəlmişkən, hakimin bu qərarı “Sabah”ın baş məşqçisini özündən çıxardı. Musayevin fikrincə, “Turan Tovuz”un futbolçusu cərimə meydançasına daxil olmamış Amin Saydiyevə qarşı qayda pozuntusuna yol vermişdi. Ancaq epizodun təkrarına baxanda da görünür ki, Seydiyev təmasdan yox, sadəcə, mübarizə zamanı uğursuz hərəkətdən yerdə qalır. Nəticədə hakimə qarşı aqressiv davarnışa görə Musayev matçın qalan dəqiqələrini tribunadan izləməli oldu. Maraqlıdı ki, qonaqlar 11 metrlik zərbəni qola çevirə bilmədilər. Ancaq bu da "bayquşlar"ı ruhlandırmadı. Ümumiyyətlə, bazar günü nədənsə meydan sahibləri görməyə adət etdiyimiz oyunu nümayiş etdirmədi. “Sabah” 90 dəqiqə ərzində cəmi iki real qol vəziyyəti yaratdı ki, ondan da yararlana bilmədi. 64-cü dəqiqədə Ayxan bəyin yetirmələri hesab arasında fərqi iki topa çatdırdı. Bu dəfə Pusinin ötürməsindən sonra penaltini boşa verən Ayxan fərqləndi. Bu qol həm də oyunun yekun nəticəsini müəyyənləşdirdi.

Gözlənilməz məğlubiyyət “Sabah”ı növbəti dəfə lider “Qarabağ”dan 8 xal aralı saldı. Bu isə, heç şübhəsiz, birinci yer uğrunda mübarizədə intriqanın xeyli azalması deməkdi.

Gözdən qaçmadı
* Hakimin Murad Musayevə qırmızı vərəqə göstərməsi onu özündən çıxardı. Qərardan narazı qalan rusiyalı mütəxəssis Kamal Umudlunun üstünə şığısa da, köməkçiləri onun qarşısını çətinliklə aldı. Texniki zonadan uzaqlaşdırılan “Sabah”ın çalışdırıcısı oyunun qalan hissəsini tribunadan izlədi.
* Matç başa çatandan sonra paltardəyişmə otağında “Turan Tovuz”un futbolçularının sevincini görməyə dəyərdi. Klubun Müşahidə Şurasının sədri Oqtay Abdullyev və sponsoru, “Huner Group”un rəhbəri Ehtiram Quliyevin təbrik üçün paltardəyişmə otağına girməsi sevinc üstünə sevinc gətirdi.
* Tovuzdan gələn azarkeşlər 90 dəqiqə dayanmadan sevimli komandalarını dəstəklədilər. Matçdan sonra isə fanklubun fəallarından bir neçəsi klubun icraçı direktoru Nadir Nəbiyevi əhatəyə aldı.

RƏŞAD