Qış fasiləsindən sonra hakimlik müzakirə mövzusuna çevrilib. Premyer-liqanın 23-cü turu da bu baxımdan istisna olmadı. Qəbələdə Əliyar Ağayevin idarəçiliyi söz-söhbətə səbəb oldusa, Masazırda keçirilən görüşdə meydan sahiblərinin baş məşqçisi Murad Musayev az qala Kamal Umudlu ilə əlbəyaxa davaya çıxacaqdı.

Kəpəz - Şamaxı, RƏŞAD ƏHMƏDOV

Autsayderlərin görüşü prinsipiallıq baxımından heç də liderlərin duelindən geri qalmırdı. Buna baxmayaraq, mingəçevirli ədalət təmsilçisi işinin öğdəsindən gəldi. Nəticəyə təsir edən səhvə yol verməyən Əhmədovun yeganə çatışmazlığı meydan sahiblərinin, demək olar, hər qolundan sonra VAR-a müraciət etməsi idi. Halbuki qolların qaydalar çərçivəsində vurulduğunu adi gözlə də görmək mümükün idi. Belə olan halda formallıq xatirinə VAR-a baxmağın nə mənası var idi? Əhmədovun bu addımı oyunun tempinə təsir edir, azarkeşlərin qol sevincini ürəkdolusu yaşamasına imkan vermirdi.

Qəbələ - Sumqayıt, ƏLİYAR AĞAYEV

Hakim final fitinə qədər oyunun tempini saxlamağa çalışdı. Əliyar Ağayevin yalnız iki qərarı müzakirəyə açıq ola bilər. Həmin epizodlardan biri Ülvi İsgəndərovun fərqlənərək hesabı açmasına qədər təşkil olunan hücum idi. Belə ki, qoldan öncə top uğrunda mübarizədə Rafael Utziq əvvəlcə Səbuhi Abdullazadə ilə toqquşdu, ardınca isə Vurğun Hüseynovun ayağını tapdalayan kimi göründü. Lakin referi VAR-dakı hakimlərlə dəqiqləşdirdikdən sonra qayda pozuntusunun olmadığına əmin oldu və mərkəzi göstərdi. 59-cı dəqiqədə isə "Sumqayıt"ın futbolçuları standart vəziyyətdən fərqlənməklə qol vursalar da, yan xətt hakimi ofsayd qeydə aldı. Baş hakim laysmanın qərarını qüvvədə saxlayaraq, VAR-a belə baxmağa ehtiyac duymadı. Ümumilikdə oyun intizamı qorundu, ciddi qayda pozuntuları olmadı. Ədalət təmsilçisi 6 dəfə rəsmi xəbərdarlığa ehtiyac duydu ki, bunun da 4-ü əsas vaxta əlavə olunan dəqiqələrdə gerçəkləşdi.

Sabah – Turan Tovuz, KAMAL UMUDLU

Bəlkə də Azərbaycana gələndən Murad Musayev ilk dəfə belə əsəbləşmişdi. Rusiyalı mütəxəssisi özündən çıxaran Umudlunun onu texniki zonadan qoması idi. Əslində həmin an “Sabah”ın baş məşqçisi “sarı”nı alıb həmişəki kimi hakimin qərarına görə öz-özünə deyinirdi. Və gözlənilmədən Umudlu ikinci sarı vərəqəni ona göstərməklə sanki ocağın üstünə benzin tökdü. Yaxşı ki, köməkçiləri və futbolçular baş məşqçinin qarşısını kəsdilər. Kim bilir, əsəbi Musayev bəlkə də hakimi vuracaqdı. Bəs onu özündən çıxaran nə idi? Hər nə qədər “Sabah”ın məşqçisini aqressiv hərəkətə görə qınayırıqsa, referinin də səhvlərini qeyd etmək lazımdı. Kamal bəyin ən böyük nöqsanı ilk dəqiqələrdən oyunun “ip”ini əldən verməsi və sərt oyunla kobudluq arasında sərhədi müəyyənləşdirə bilməməsi oldu. Bir epizodda ikili mübarizə zamanı sərt oyuna imkan verməyib fitini səsləndirirdisə, bir neçə dəqiqə sonra oxşar vəziyyətdə oyunu davam etdirirdi. Musayevi də “dəli” edən məhz bu oldu. Ümumiyyətlə, Umudlu sanki meydana dayanmadan fit çalmağa çıxmışdı. Onun bunu tez-tez etməsi matçın sürətini də öldürürdü.

Zirə - Qarabağ, TURAL QURBANOV

İlk dəqiqələr göstərdi ki, matç gərgin keçəcək. Ona görə də Tural Qurbanov tez-tez müdaxilə edirdi. Referi hər xırda toqquşmanı, mübarizə epizodunu qayda pozuntusu sayaraq fit çalırdı. Onun bu hərəkəti "Zirə"nin baş məşqçisi Rəşad Sadıqovu hövsələdən çıxardığından, mütəxəssis 4-cü hakimə etirazını bildirirdi. Hakim ilk yarıda rəsmi xəbərdarlığa ehtiyac duymadı. Lakin ikinci hissədə 5 dəfə əlini cibinə atdı. Amma göstərdiyi sarı vərəqələrin hər biri yerində idi.

Neftçi – Səbail, KAMRANBƏY RƏHİMOV

Görüş, demək olar ki, penalti ilə başladı. Sayefin künc nöqtəsindən ötürməsindən sonra top Elmir Tağıyevin əlinə dəydi. Rəhimov bunu görməsə də, VAR-da əyləşən Cavid Cəlilov penaltinin verilməsinə səbəbkar oldu. Bir sözlə, hakimin səhvi “sığortalandı”. İkinci hissə başlayan kimi verilən penalti qərarı da doğru idi. Emil Balayev Azər Əliyevin qarşısını qaydalar çərçivəsində almamışdı. İlk penalti epizodunu saymasaq, Kamranbəyin oyunu yaxşı idarə etdiyini söyləyə bilərik.