Yola saldığımız 29-cu turun görüşləri də idarəçilik baxımından qənaətbəxş alındı.

Hər halda, 5 qarşılaşmanın yekun nəticəsinə təsir edən qərarların şahidi olmadıq. Tur həmçinin debütlə yadda qaldı ki, Emin Əliyevin idarəçiliyini bəlli həyəcan fonunda ümumilikdə qənaətbəxş saya bilərik. Hay-küy isə Səbaildə qopdu. İnqilab Məmmədovun qərarları Murad Musayevi çılğına döndərdi. Amma “Sabah”ın baş məşqçisinin iradlarının böyük əksəriyyəti məğlubiyyətdən irəli gələn qəzəbdən doğurdu. Əksinə, referini təhqir edən mütəxəssis oyundan sonra yox, daha tez qırmızı vərəqə ilə “mükafatlandırılmalıydı”.

Qarabağ – Kəpəz, EMİN ƏLİYEV
Gənc referinin premyer-liqada debüt oyunu idi. Bu üzdən onun həyəcan üzündən müəyyən səhvlərə yol verəcəyi gözlənilən idi. 14-cü dəqiqədə Ahmed Ayzaya mərkəzdən sürətli hücuma keçərkən Riçard Almeyda ona qarşı kobud oynasa da, hakim “sarı”ya ehtiyac duymadı. 45-ci dəqiqədə isə Qara Qarayev də rəqib futbolçuya qarşı kobud oynadı ki, referi yenə əlini cibina atmadı. Buna rəğmən, 27-ci və 56-cı dəqiqələrdə təyin etdiyi penaltilər haqlı idi. Ümumilikdə referi bəzi səhv qərarlarla yadda qalmasına baxmayaraq, oyunun nəticəsinə təsir edən yanlışlığa yol vermədi.

Qəbələ - Zirə, TURAL QURBANOV
Gənc referi idarəçilik baxımından hansısa səhvə yol vermədi. Düzdü, Rəşad Sadıqov bəzi məqamlarda hakimlər briqadasına etiraz edirdi. Lakin bu, “Zirə”nin çalışdırıcısının vərdişi kimi qəbul olunmalıdı. Baş məşqçilərin oyundan sonra da sikayətinin olmaması Tural Qurbanovla köməkçilərinin qarşılaşmanı yaxşı idarə etdiyinin göstəricisidi. Təbii ki, xırda səhvlərə yol verdilər. Ümumilikdə isə briqada işini ideala yaxın gördü. Bir məqama xüsusi diqqət yetirmək lazımdı. "Qəbələ" - "Zirə" matçı turun ən çətin görüşü idi. Buna baxmayaraq, Tural Qurbanovun gərgin mübarizə şəraitində keçən oyunda böyük səhvə yol verməməsi ölkə futbolu adına sevindirici məqamdı.

Səbail –Sabah, İNQİLAB MƏMMƏDOV
Əvvəlcə onu qeyd edək ki, derbi adına layiq görüş izlədik. Görüşdə mənfi məqam Murad Musayevin tez-tez qərarlara etiraz etməsi idi. Rusiyalı mütəxəssis sanki referidən acıqlı idi. Özü də bunu mətbuat konfransında etiraf etdi. Onun etiraz etdiyi məqamlara diqqət yetirək. Amin Seydiyevin 7-ci, Boyan Letiçin 21-ci dəqiqədə sarı vərəqə alması. Hər iki epizodu diqqətlə izlədikdə görürük ki, İnqilab Məmmədov qərarında haqlıdı. Adı çəkilən futbolçular rəqiblərinə sərt müdaxilə etmişdi. Con İrasabalın qırmızı vərəqə alması barədə isə danışmağa belə ehtiyac yoxdu. Çünki həmin anda futbolçu meydandan qovulmalı idi ki, qovuldu da. Məmmədovun görüş ərzində bir yanlış qərarı var idi. Referi Murad Musayevi 83-cü dəqiqədə meydandan qovmalı idi. Çünki rusiyalı hakimi təhqir etmişdi. Amma baş hakim ona "qırmızı"nı görüşdən sonra göstərdi. Bu səhvi nəzərə almasaq, hakimlər briqadasının matçı yaxşı idarə etdiyini söyləyə bilərik.

Turan Tovuz – Şamaxı, RƏVAN HƏMZƏZADƏ
Şəkili referi premyer-liqada sərt oyuna üstünlük verən, tempi qorumağa çalışan, daha çox kölgədə qalmağı sevən ədalət təmsilçilərindəndi. Tovuzdakı qarşılaşmada da bunu növbəti dəfə sübut etdi. Heç-heçə başa çatan matçda hakimlər briqadasına nəyə görəsə irad bildirmək yersiz olar.

Sumqayıt – Neftçi, RAUF ALLAHVERDİYEV
Böyük hesabla yekunlaşan oyunda idarəçiliyi önə çəkmək, baş hakimin nəticəyə təsir edən səhvə yol verdiyini yazmaq absurd olar. Allahverdiyev yüksək tempdə keçən qarşılaşmada 90 dəqiqə oyundan “qopmadı” ki, bunu onun adına müsbət məqam kimi təqdim etmək lazımdı. Yeganə çatışmazlığı köməkçiləri ilə anlaşmasında idi. Bəzi epizodlarda laysmanlar fərqli qərar verdiyi halda, o köməkçisinə baxmadan məsuliyyəti üzərinə götürərək əks qərar verirdi. Xüsusilə aut atışlarında bu özünü qabarıq göstərirdi.