“Hər iki zədə təsirli oldu. Birincidə dilimin qatlanmasından və zərbənin səhhətimə mənfi təsir etməsindən ehtiyatlandım. Həkim müdaxiləsinin vacib olduğunu hiss edirdim. Bu üzdən hərəkət etmədən gözlədim. Özümə gəlmək üçün zaman lazım idi. Yoxsa ağır nəticələrlə üzləşə bilərdim. İkinci zədə topun üzümə çırpılmasına görə oldu. Dodaqlarım partladı. Əzələlərin keyiməsi indi açılır. Ağrıları yavaş-yavaş hiss edirəm. Ümumilikdə sağlamlığım qaydasındadı. Qısa zamanda daha yaxşı olacam.

Oyuna gəlincə, “Neftçi”nin pressinqlərlə rəqib üzərində təzyiq yaradan komanda olduğunu bilirik. Ona görə də daha çox müdafiəyə üstünlük verdik. Əsas vaxtda bunu bacarsaq da, uzatma dəqiqələri “Turan Tovuz” üçün düşərli olmadı. Komandamın hücum cəhdləri uğurlu alınmadı. İlk 90 dəqiqəlik performansımıza əsasən qətiyyən məğlubiyyət gözləmirdik. Qələbəyə köklənmişdik. Hələ də yaşananların şokundayıq”.