ÇL-də 11 ildən sonra ilk dəfə 1/4 finala vəsiqə qazanan “Milan” aprelin 12-də keçirilən ilk oyunda “Napoli”yə minimal hesabla qalib gəlmişdi.
"Football-plus.az" xəbər verir ki, tarixində ilk dəfə ÇL-in (Çempionlar Kubokunun) bu mərhələsinə çıxan neapollular daha əvvəl milanlılardan böyük zərbə almışdılar. İtaliyanın son çempionu aprelin 2-də Neapolda baş tutan matçda A seriyasında inamla liderlik edən rəqibinin qapısından 4 cavabsız top keçirmişdi. Luçano Spallettinin komandasının bu məğlubiyyətlərin əvəzini evdəki cavab görüşündə çıxmaq şansı vardı. İlk oyunu zədə üzündən buraxan, 21 qolla A seriyasının bombardiri olan Osimhenin zədəsini sağaltması neapolluları ümidləndirməyə bilməzdi. Amma bu da var ki, onlar Milandakı matçda cəzalı duruma düşən yarımmüdafiəçi Zambo Angissa ilə müdafiəçi Kim Min Çjedən də yararlana bilməyəcəkdilər. Bu itkilər isə Spallettinin planlarına ciddi zərbə idi.
Əfsanəvi Dieqo Maradonanın adını daşıyan stadiondakı həlledici matç ev sahiblərinin aşkar üstünlüyü şəraitində keçdi. Lakin neapollular statistik üstünlükdən rəqib qapısı qarşısında müntəzəm təhlükələr yaratmaq baxımından istifadə edə bilmədilər. Stefano Pyolinin komandası rəqibin Kvaratsxeliya və Osimhen kimi əsas qol silahlarının qarşısını təşkilatlanmış oyunu ilə almağı bacarırdı. Sıx müdafiə olunan milanlıların nadir əks-hücumları daha effektli alınırdı. İlk hissənin ortalarında Leao komandasına penalti qazandırdı, ancaq Jirunun zərbəsini Meret dəf etdi. Fransalı hücumçu fasilə ərəfəsində portuqaliyalı oyundaşının ötürməsi ilə hesabı açaraq səhvini düzəltdi.
“Napoli” ikinci hissədə oyun planında üstünlüyünü bir qədər də artırdı. Lakin Spallettinin komandası yenə hücum xəttində yaradıcı oyun sərgiləməkdə çətinlik çəkirdi. Ev sahiblərinin cərimə meydançasına çoxsaylı asmaları qonaqlar üçün ciddi təhlükələr yaratmırdı. 82-ci dəqiqədə neapollular Tomorinin topa əllə toxunmasına görə penalti vurmaq hüququ qazandılar. Amma Kvaratsxeliyanın zərbəsini Menyan dəf etdi. Bununla belə, ev sahibləri əsas vaxta əlavə olunan dəqiqələrdə Osimhenin sayəsində məğlubiyyətdən qaça bildi. Lakin heç-heçə onların işinə yaramadı. Beləliklə, “Milan” ən nüfuzlu klub turnirində uzun fasilədən sonra yarımfinala çıxdı. Pyolinin komandası növbəti mərhələdə “İnter” – “Benfika” cütünün qalibi ilə oynayacaq. “Napoli” isə bundan sonra İtaliya çempionluğunu daha tez rəsmiləşdirməyə çalışacaq.
oyunun statistikası
23 (4) qapıya (“çərçivə”yə) zərbə 6 (4)
16 künc zərbəsi 1
0 ofsayd 1
14 qayda pozuntusu 12
2 (0) sarı (qırmızı) vərəqə 2 (0)
63 topa sahibolma (faizlə) 37
Faktlar
* “Milan” ÇL-də 16 ildən sonra yarımfinala vəsiqə qazandı. Komanda sonuncu dəfə bu mərhələdə 2007-ci ildə çıxış etmişdi. “Qırmızı-qaralar”
həmin il keçirilən finalda “Liverpul”a qalib gəlməklə (2:1) turnirin qalibi olmuşdular.
* Jiru 11 ildən sonra penaltini qola çevirə bilmədi. Fransalı hücumçu sonuncu dəfə “Arsenal”da çıxış edərkən, 2012-ci il sentyabrın 26-da real qol şansını boşa vermişdi. O vaxtdan Jiru 17 penaltinin hamısından yararlana bilmişdi.
* Meret ÇL-də son 18 ildə “Milan”ın oyunçusunun penalti zərbəsini dəf edən ilk qapıçı oldu. Sonuncu dəfə buna nail olan qapıçı Yeji Dudekdi. “Liverpul”un sabiq qapıçısı 2005-ci ildə keçirilən finalda Andrey Şevçenkonun zərbəsini dəf etmişdi.