Hesabat turunda turnir cədvəli baxımından böyük əhəmiyyət kəsb edən bir neçə qarşılaşma baş tutdu.

"Football-plus.az" xəbər verir ki, “Bavariya” tura 4-cü pillədə daxil olan “Frayburq”un qonağı oldusa, “Borussiya” 3-cü pillədəki “Union”u qəbul etdi. Amma sürpriz gözləyənlərin ümidləri doğrulmadı. Frayburqdakı qarşılaşma elə proqnozlaşdırıldığı kimi keçdi. Münhen nəhəngi çətinliklə də olsa, hesabına 3 xal yaza bildi. “Frayburq”un “Bavariya” sindromu davam edir. Bu komandanın münhenlilərə qarşı son 40 oyunda cəmi 1 (!) qələbə qazanmasına başqa ad vermək mümkün deyil (8 heç-heçə, 31 məğlubiyyət). Yeganə qələbə 2015-in mayında əldə olunub ki, həmin vaxt “Bavariya” artıq çempionluğu rəsmiləşdirmişdi. Tomas Tuxel münhenlilərin başında 2-ci bundesliqa oyunundan da qələbə ilə ayırlmağı bacardı. “Borussiya” isə berlinlilərlə matçda xal itirməyə yaxın olsa da, Mukokonun qolu həlledici oldu. “Arılar” 2 xallıq fərqi qoruyaraq “Bavariya”nın təqibini davam etdirdilər. Onu da bildirək ki, “Borussiya” bundesliqa çərçivəsində ardıcıl 47-ci ev oyununda qol vurmaqla şəxsi rekordunu bir qədər də yaxşılaşdırdı.

“Leyptsiq”in böhrandan çıxdığını artıq əminliklə söyləmək olar. Ötən həftəiçi “Borussiya”nı yenərək kubokun yarımfinalına yüksələn “öküzlər” bu dəfə ən sevimli rəqibini – “Herta”nı minimal hesabla üstələdilər. Paytaxt təmsilçisinə qarşı bundesliqada 14-cü oyunda 12-ci qələbəsini qazanan “Leyptsiq” səfərdəki 7 oyunun hamısından qələbə ilə ayrılıb! Marko Rozenin kollektivi bu zəfər sayəsində 4-cü pilləyə yüksəldi. Turun daha bir maraqlı oyununda ÇL-ə vəsiqə uğrunda mübarizə aparan iki komanda – “Bayer-04” ilə “Ayntraxt” üz-üzə gəldi. Yüksəlişini davam etdirən Leverkuzen təmsilçisi rəsmi matçlarda ardıcıl 7-ci qələbəsini qazandı! Enişdə olan frankfurtluların isə qələbəsiz seriyası 6 oyuna çatdı. Onlar səfərdə son qələbəsini DÇ-2022-dən əvvəl qazanıb. “Aspirinlər”i artıq ÇL zonasından cəmi 4 xal ayırır. Maraq üçün bildirək ki, Xabi Alonso oktyabrın əvvəllərində komandanı 17-ci pillədə qəbul etmişdi! “Şalke-04”ün, deyəsən, barıtı yenə tükəndi. Sonuncu pillə sanki bu komandanı maqnit kimi özünə çəkir. 8 oyunluq məğlubiyyətsiz seriya yaxalayıb alt pillələrdən qurtulan Helzenkirhen təmsilçisi indi yenidən məğlubiyyətləri sıraladığı üçün sonuncu pilləyə qayıtdı. “Mayns-05” ilə “Verder”in duelində 85-ci dəqiqədən sonra 4 top vuruldu! Bundesliqada sonuncu dəfə belə hadisə 1980-ci ilin yanvarında “Verder”in evdə “Münhen-1860”a 4:6 hesabıyla uduzduğu oyunda baş vermişdi.

Turun rəqəmi
50 – Edin Terziç “Borussiya”nı börandan çıxara bildi. “Unon”la qarşılaşma bu mütəxəssisin “arılar”ın başında keçirdiyi yubiley – 50-ci bundesliqa oyunu oldu. Komanda bu 50 oyundan 32 qələbə, 5 heç-heçə, 13 məğlubiyyətlə ayrılıb. Bu, klub tarixinin rekord göstəricisidi. İndiyə qədər “Borussiya”da heç bir məşqçi ilk 50 çempionat oyununda 32 qələbəyə sevinməmişdi. Əvvəlki rekord ilk 50 oyunda 31 qələbə qazanan Tomas Tuxelə məxsus idi.

Turun ulduzu
Yussufa Mukoko (Borussiya D) – bu gənc istedadın sayəsində bundesliqada intriqa davam edir. “Union”un müdafiəsini yarmaqda çətinlik çəkən “arılar” sonradan meydana çıxan Mukokonun sayəsində qələbə qolunu vurdular. Yeri gəlmişkən, Mukoko 18 yaş 139 günlüyündə bundesliqada 50 oyun həddinə ən gənc yaşda çatan oyunçu oldu. Əvvəlki rekord “Bayer-04”lü Florian Virtsə (18 yaş 226 gün) məxsus idi. Yussufa həm də turnirin tarixinda qol vuran ən gənc oyunçu rekordunu əlində saxlayır. O, 2020-nin dekabrında həmin tarixi qolu məhz elə “Union”un qapısına vurmuşdu.