Srağagün sanki təbiət də meydana çıxan komandalarla eyni dərddə idi. Elitada qalmaq yönündə həm meydan sahiblərinin, həm də qonaqların başının üstünü qara buludlar aldığı kimi, Şamaxıda da soyuq, buludlu, boz hava hökm sürürdü. Sanki yaz yox, payızın ortası idi.

Bəlkə hava şəraiti, bəlkə də xal itirmək qorxusu komandaların əhval-ruhiyyəsinə təsir etmişdi. Və bu üzdən stadiona toplaşan azarkeşlər darıxdırıcı, təhlükəli vəziyyətlər baxımından qısır oyuna şahidlik etdi. İlk yarıda yaddaqalan üç epizod oldu ki, ikisi qonaqlardan gəldi. 7-ci dəqiqədə Kamran Əliyevin cərimə zərbəsi tirdən döndüsə, fasiləyə 2 dəqiqə qalmış Todorski Xaçayevin cərimə meydançasına ötürməsinə vaxtında yetişə bilmədi. Meydan sahiblərindən isə 32-ci dəqiqədə Daşdəmirovun uzaqdan zərbəsinə İlnur gözəl reaksiya verdi, Raufun təkrar zərbəsini də qolkiper kornerə çıxara bildi.
Fasilədən sonra “Sumqayıt” daha fəal təsir bağışlasa da, bunu hesabda əks etdirə bilmədi. 90 dəqiqənin tamamında qələbə qazanan olmasa da, heç-heçə daha çox qonaqların işinə yaradı. Axı onlar indi “Şamaxı”dan 3, “Səbail”dən 4 xal irəlidədi.

Gözdən qaçmadı
* “Sumqayıt”ın fanatları Şamaxıya böyük heyətlə gəlmişdi. Təxminən 120-yə yaxın sumqayıtlı 90 dəqiqə dayanmadan sevimlilərini dəstəkləməklə yadda qaldılar.
* Oyun başa çatandan sonra “kimyaçılar”ın futbolçuları birbaşa paltardəyişmə otağına yollansalar da, bir neçə dəqiqədən sonra meydana dönüb dəstəyə görə azarkeşlərə təşəkkür etməyi özlərinə borc bildilər.
* Yerli komandanın yaşlı azarkeşlərindən biri üzünü yaxınlıqda əyləşən Riad Rəfiyevə tutaraq “legionerləri yığıb gətirirsiz, azərbaycanlı balalarını oynadın. “Şamaxı” yerlilərə şans verən yeganə komandadı. Dünya yığmalarını xatırladırsız” kimi replikalar atırdı. Bunu görən “Şamaxı”nın İdarə Heyətinin sədri Elçin Usub Rəfiyevə yaxınlaşaraq gülə-gülə “növbəti oyunlarda əks istiqamətdə sizə yer verərik” deməklə yadda qaldı. Matçın ikinci hissəsində isə asayiş keşikçilərindən biri ağsaqqala yaxınlaşaraq sakit durmağı xahiş etdi.