“Udineze”nin müdafiəçisi Destini Udoci çox qəribə hadisəyə səbəbkar olub: maşını idarə edə bilməyərək bara çırpılıb.

“Football-plus.az” xəbər verir ki, hadisə gecə saat 3 radələrində baş verib. Maşına nəzarəti itirən futbolçu barın ərazisinə daxil olub. Polis ilkin təhqiqat zamanı italiyalı futbolçunun ayıq olduğunu üzə çıxarıb. Xoşbəxtlikdən heç kim zərər çəkməyib. Barın sahibləri artıq itkini sayır. Onlardan birinin dediyinə görə, maşın 12 stulu, 3 kiçik stolu, bir neçə çətiri, onlarla dekorativ bitkini sıradan çıxarıb. Bara təxminən 3 min avro ziyan dəyib. Barın sahibi kədərlə deyir: “Maşın düz bara uçdu, bu toqquşma bomba partlamasına bənzəyirdi. Yaxşı ki çətirlərdən biri xilas olub, bunlar heç də ucuz deyil. Daha birini yaxınlıqda dayanan maşının altından tapdıq”.

Ən vacib məqam odu ki, Destini hadisə yerindən qaçmayıb və ziyanı, eləcə də cəriməni ödməyə hazırdı. Bəs bu futbolçu kimdi?

Udoci Veronada, Nigeriyadan olan mühacirlərin ailəsində dünyaya gəlib. 10 yaşında yerli klubun akademiyasına qoşulub, 15 yaşından isə İtaliyanın aşağı yaş qrupu yığmalarına çağrılır, “Yuventus” azarkeşidi, uşaqlıqdan bu klubun formasını geyməyi arzulayır. Sol cinahda oynayan futbolçu oyun üslubuna görə Əşrəf Hakimini xatırladır. Bəzən hücuma hədsiz həvəs göstərir: “Hücumda oynamaq xoşuma gəlir. Fiziki cəhətdən dözümlüyəm. Texnikam da yaxşıdı, niyə irəlidə oynamayım ki?!”

“Udineze”nin əsas ulduzunun növbəti iş yeri də məlumdu. “Tottenhem” yeniyetməyə görə hələ ötən yay Udine klubuna 18 milyon avro ödəyib. Bir sözlə, Destinini irəlidə parlaq gələcək gözləyir. Bir şərtlə ki, daha bundan sonra bara girməsin!