İlk dəfə deyil ki, tribunalarda “istefa” şüarları eşidilir.

Bu dünən də olub, bu gün də var, sabah da olacaq. Ancaq “Turan Tovuz” – “Şamaxı” matçında bir qrup tovuzlu azarkeşin Ayxan Abbasovu istefaya səsləməsi geniş əks-səda doğurdu. Tərəfdarın qələbə istəyi anlaşılandı. Könül verdiyi komandanın qələbə qazanmasını istəməyən azarkeş ya klubla prinsipi olan, ya da şəxsi mənafeyini güdən biridi. Lakin Tovuzdakı “istefa” şüarı fərqli idi. Hiss olunurdu ki, bunun arxasında başqa niyyət durur. 80-ci dəqiqədə, matçın başa çatmasına minimum 12-13 dəqiqə qalmış, hesab 1:1 olarkən bir qrup azyaşlının “istefa” qışıqırması başadüşülən deyil. Bəlkə də onlar özləri də bilmədən hansısa “böyük oyun”un iştirakçısıdı.

“İstefa” qışqıranlar biranlıq özlərinə sual versinlər: Ayxan Abbasov istefaya səslənməyə layiqdi? Baş məşqçi ilə problemi olmayan şəxs bu suala yalnız belə cavab verə bilər: xeyr! Niyə? 9 ildən sonra ölkə futbolunun elitasına qayıdan, ötən yay sıfırdan formalaşan, təlim-məşq toplanışı üçün pul tapmayan, icra başçısının ianəsi hesabına Gürcüstana yollanan, AFFA-dan ayrılan maliyyə hesaba köçənə qədər rayondakı marketlərə 50 min manatdan çox borcu olan, qarşısına eliada qalmaq məqsədi qoyulan (AFFA İcraiyyə Komitəsinin martın 7-də keçirilən iclasına qədər bu məsələ aktual deyildi), əksər yerli futbolçuların “Tovuz Bakıdan uzaqdı, gələ bilmərəm” deyərək təklifindən imtina etdiyi, minimum maaşa razılaşan legionerlərin yer aldığı komanda hazırda turnir cədvəlində 6-cı pillədə qərarlaşıb. Sizcə, bu pis nəticədi?

Bununla yanaşı, Ayxan bəyin baş məşqçisi olduğu komanda bir neçə gündən sonra ölkə kubokunun yarımfinalında oynayacaq. “Qarabağ”, “Sabah”, “Zirə” kimi büdcəsi qərb təmsilçisindən qat-qat üstün olan klubların kubok arzusu ürəyində qaldığı halda tovuzlular mövsümü titulla bitirmək şansını hələ də saxlayır. Buna görə baş məşqçini istefaya səsləmək lazımdı? Bəli, Tovuzda futbolu bilənlərin sayı çoxdu, bölgənin futbol ənənələri var. Ancaq bu o demək deyil ki, “Şamaxı” ilə heç-heçəyə görə baş məşqçi postundan getməlidi. Bu həmin “Şamaxı”dı ki, bu yay Konfrans Liqasında ölkəmizi təmsil edəcəyini indidən rəsmiləşdirən “Sabah”dan xallar qoparıb. Bu həmin “Şamaxı”dı ki, yerli və gənc azərbaycanlı uşaqlarla autsayderlərlə yanaşı, ilk “üçlük”də yer alanların əsəbi ilə oynamağı bacarıb. Bəli, “Turan Tovuz” “Şamaxı” ilə qarşılaşmada heç də ən yaxşı oyununu sərgiləmədi. Ancaq mövsüm bir oyundan ibarət deyil, “istefa” qışqıranlar bunu unutmasın.

RƏŞAD