"Mövsümün startından demişdim ki, 4-cü yer uğrunda "Zirə" ilə "Qəbələ" arasında gərgin mübarizə gedəcək. Komandaları müqayisə etsək, "qırmızı-qaralar" hücumda daha kreativ çıxış edir. Elmar Baxşıyevin yetirmələri hücuma daha çox aludə olur. Bu onların həm üstünlükləri, həm çatışmazlıqlarıdı. Hücuma o qədər aludə olurlar ki, müdafiə olunmağı unudurlar. Hətta hesabda öndə olanda da müdafiəni yaddan çıxarırlar. Amma son oyunda qələbə hesabını qoruya bildilər.

"Zirə"yə gəlincə, komanda avrokubokda uğursuz çıxışdan sonra ruh düşkünlüyü yaşadı. Bu da çempionat oyunlarına təsirsiz ötüşmədi. Qəsəbə təmsilçisi heyətini mütləq gücləndirməliydi. Düzdü, yeni oyunçular komandaya qoşuldu, amma gec oldu. Hər biri yaxşı futbolçulardı. Sadəcə, gec qoşulduqlarına görə uyğunlaşmaqda çətinlik çəkirlər. Hələ qarşıda 7 tur var. İndidən dəqiq demək olmaz, kim 4-cü yerin sahibi olacaq. Komandalar arasında cəmi 1 xal fərq var. Dəqiq olan odu ki, 4-cü yer uğrunda son tura qədər gərgin mübarizə gedəcək. Hər iki komandaya uğurlar arzu edirəm".