İngiltərə premyer-liqasında fit çalan hakimlərindən Ramazan ayında keçirilən oyunlarda fasilə vermələri tövsiyə olunub.

"Football-plus.az" xəbər verir ki, bu, oruc tutan oyunçuların su içməsi və az da olsa, qida qəbul etməsi üçün nəzərdə tutulub.

Həmçinin hakimlərə tövsiyə olunub ki, oyun zamanı iftar açmalı olacaq oyunçuları matçlar başlamamış müəyyənləşdirsinlər və onlarla fasilənin təxmini başlama vaxtı barədə razılığa gəlsinlər. Qeyd edək ki, premyer-liqada Riyad Mahrez (Mançester Siti), Məhəmməd Salah (Liverpul) və Nqolo Kante (Çelsi) kimi bir çox məşhur futbolçu müsəlmandı.

Amma Avropanın digər aparıcı liqasında Ramazan ayına tam fərqli münasibət bəslənilir. Fransa Futbol Federasiyasının (FFF) Hakimlər Komissiyası Liqa-1-in oyunlarına təyinat alan hakimlərə müsəlmanların müqəddəs ayında matçlarda fasilələrə qadağa qoyulduğunu elan edib. Buna əsas kimi oyunlar zamanı futbolçuların oruclarını açmaq üçün tətbiq edilən fasilənin FFF-nin nizamnaməsinə uyğun gəlmədiyi göstərilib. Bu qadağanı pozan hər bir şəxs intizam və və qanuni planlarda məsuliyyətə cəlb olunacaq.

Federasiyanın hakimlərə elektron poçt vasitəsilə göndərdiyi bildirişdə oyunlarda hər hansı siyasi, ideoloji, dini, həmkarlar ittifaqı çıxışları və şüarlarının qadağan olunduğu qeyd edilib.