"İftara uyğun vaxtın tənzimlənməsi elə olmalıdı ki, heç bir komanda ziyan çəkməsin" - AÇIQLAMA
“Zirə” - “Səbail” matçında Hacıağa Hacılı əvəzlənərkən Əliyar Ağayev prosesi bir az yubatdı.
Buna səbəb iftar vaxtının olması idi. FİFA referisi futbolçuların orucu açmasını təmin edəndən sonra dəyişikliyə icazə verdi. Bütün dünyada Ramazan ayında keçirilən oyunlarda hakimlər iftar vaxtı matçı dayandırır, futbolçuların oruc açmasını təmin edir. Sonradan itirilən dəqiqələri nəzərə alır. Bizdə isə topun meydanı tərk etməsini və ya cərimə zərbəsinin təyin olunmasını gözləyirlər. Olmaz ki, Azərbaycanda da yuxarıda deyilən kimi edilsin? Bu sualı beynəlxalq dərəcəli hakim Tahir Süleymanova ünvanladıq: “Futbolun bəlli qaydaları var və buna uyğun meydanda idarəçilik edilir. Qeyd etdiyiniz məsələ daha çox mənəvi tərəfdi. Futbolçu dəyişiklikləri zamanı bütün prosedur qaydalar tam yerinə yetirilibsə, oyun dayanıbsa, hakimlər briqadası onun meydana çıxmasını ləngidə, qarşısını ala bilməz. Qaydalara uyğun əvəzetmələr yalnız komandalara aid olan məsələdi, hakimlərin vəzifəsi matçın dinamikasına xələl gətirmədən qaydalara uyğun dəyişikliklərə nəzarət etməkdən ibarətdi. Ramazan ayıdı, bəzi qarşılaşmalar iftar vaxtına düşür. Nəticə, meydanda mübarizlik, prinsipiallıq öz yerində, ən vacibi insan sağlamlığı, mənəvi məsələlərdi. Oruc tutan futbolçular sutkanın yarıdan çoxunda qidasız, əsasən də susuz qalırlar. Oyunlar iftar vaxtına düşürsə, rəsmi nümayəndələr, hakimlər, komandalar öncədən razılaşaraq bəlli dəqiqədə matçın qısa vaxtda dayanmasını təmin edə bilərlər. Buna heç kim etiraz etməz. Yarışları keçirən təşkilatın məsələyə rəsmi münasibət göstərməsi, müvəqqəti qaydalar tətbiq etməsi doğru olmaz, mənəvi cəhətdən şifahi, tövsiyə xarakterli yanaşma ola bilər. Meydanda təkcə müsəlman futbolçular olmur, hər kəsə, bütün inanc sahiblərinə hörmətlə yanaşılmalıdı. Belə hallarda oyunun nizamlanması baş hakimin üzərinə düşür. İftara uyğun vaxtın tənzimlənməsi elə olmalıdı ki, heç bir komanda ziyan çəkməsin, üstünlük qazanmasın. Kəskin əks-hücumlarda, qol epizodlarında referilər ehtiyatlı olmalı, vaxta uyğun şablonluğa yol verməməlidi. Digər məqamlarda hansısa problemin yaşanması inandırıcı deyil. Əksinə, mənəvi tərəfdən oyunlarda, tribunalarda, futbol ictimaiyyəti arasında belə yanaşma müsbət qarşılanar".
Digər xəbərlər
