"Yığma böyük hesabla uduzursa, burda günah yalnız qapıçılarda deyil. İki oyuna 9 qol buraxmaq həqiqətən də utancvericidi. Təbii ki, qolkerlərin də səhvlərini danmaq olmaz. Ümumiyyətlə, Şahruddinin yoxluğunda yığmaya dəvət edilən “əlcək sahibləri” çempionatınmızın ən yaxşılarıdı. Amma yaxşı olmaqla iş bitmir. Təəssüf ki, 10 elita klubunda qapıçı mövqeyində ciddi rəqabət yoxdu. Bu gün həm Səlahət, həm Emil, həm də Yusif komandalarında rahat oynayır. Çünki ehtiyat oyunçular skamyasında onlara ciddi rəqib ola biləcək qolkiper yoxdu. Klublarda rəqabətin olmaması da qapıçıların hazırlığına ciddi təsir göstərir.

Rəqiblərin heyətindəki qapıçılara nəzər yetirin, hər biri güclü liqalarda çıxış etməklə yanaşı, klublarında rəqabət aparırlar. Etiraf edək ki, Yusif İmanov çox perspektivli gənc qapıçıdı. Hələ ötən mövsümdən şans qazanmağa başladı. Bu ildən isə komandasının əsas qapıçısına çevrilməyi bacarıb. Amma bu o demək deyil ki, o artıq əvəzolunmazdı və Azərbaycan yığması üçün tam yetişib. Ən əsası Misli premyer-liqası ilə AÇ-2024-ün seçmə mərhələsini bir tutmaq da absurdu. Yəni, yığmanın heyətində heç bir yoldaşlıq oyunlarında şans qazanmayan, həyəcan keçirməyən gəncə birdən-birə güclü millilərin yer aldığı F qrupunda şans verirsən. Bu onu sanki şirin ağzına atmaq kimidi. Ona görə də qəti mövqeyim budu ki, gənc qapıçını milliyə qazandırmaq üçün ona əvvəlcə sınaq oyunlarında şans vermək lazımdı.

Yığmanın son 2 oyununu təhlil etsək, qapıçıları qaralamağın tərəfdarı deyiləm. Bu yanaşma olduqca ədalətsizdi. Çünki yığmada komanda oyunundan söhbət gedə bilməz. İsveçə məğlubiyyətdə qollar meydan oyunçularının top itkilərindən sonra vuruldu. Yəni, o cür oyunla, qapıda kimin durmasından asılı olmayaraq, qollar buraxacaqdıq. Deyək ki, qapıdan Səlahət dayansaydı, nəticə 0:5 yox, 0:4 və ya 0:6 olacaqdı. Bu hansı yaramızı sağaldır? Amma nəticə önəm kəsb etmirsə, o zaman sırf cavanların, o cümlədən Yusif İmanovun oynadılmasının tərəfdarıyam. Ən azı onun üçün belə oyunlar təcrübə deməkdi. İstənilən halda, klublarımızda qapı xəttində ciddi rəqabət yaradılmalıdı".