Ötən gün 1-ci divizionda 20-ci turdan təxirə salınan "Şamaxı-2" - "Mingəçevir" görüşü keçirildi.

Oyunda diqqət çəkən məqam 87-ci dəqiqədə "işıqçılar"ın heyətində iranlı qapıçı Seyed Huseininin əvəzetmədən meydana çıxlaraq debüt etməsiydi. Arazın o tayından olan "əlcək sahibi"nin çıxışıyla bağlı baş məşqçi Şəhruz Mustafayevin təəssüratını öyrəndik. Onun "Football-plus.az" saytına açıqlaması belə oldu:

"İranlı qapıçı 2-ci dövrədə bizə qoşulub. Amma bu vaxta kimi şans qazanmamışdı. Son dəqiqələrdə ona şans vermək qərarına gəldim. Hakimin də əlavə etdiyi dəqiqələrlə birgə təxminən 10 dəqiqə meydanda oldu və həyəcanı daddı. Qarşıda hələ çox oyunlarımız var. Əsas qapıçımız sıradan çıxa, cəzalana bilər. Ona görə indidən Seyed Huseinini oyunlara hazırlamaq istəyirik".

Xatırladaq ki, iranlı qapıçı "Mingəçevir"də çıxışına görə klubdan məvacib almır. Hətta diviziondakı legioner limitiylə bağlı ödənişinin 6 aylığını da özü edib. Qolkiper təcrübə qazanmaq üçün 1-ci divizionda oynayır.

ABDULLA İSMAYILOĞLU