Birinci divizionun son turunun "Mingəçevir" - "Zaqatala" qarşılaşmasında maraqlı detal diqqətimizdən yayınmadı.

Belə ki, protokola baxarkən "işıqçılar"ın ehtiyat oyunçular skamyasında Seyed Huseini adlı oyunçuya rast gəldik. Maliyə imkanı yetərincə zəif olan "Mingəçevir" heyətinə əcnəbi oyunçu qatıb? Bunu aydınlaşdırmaq üçün klubun İdarə Heyətinin sədri Ruslan Həmidovla əlaqə saxladıq:

"Heyətimizə cəlb olunan futbolçu iranlıdı. Ampluaca qolkiperdi. İranda çıxış edəndən sonra ölkəmizə gəlib. 8 ay həvəskar "Rekord"un heyətində məşq edib. Dekabrdan komandamızla birgə məşq edirdi. Onun keçidi üçün 1 qəpik də xərcləməmişik. Nə bizdən maaş alacaq, nə qidalanma, nə də qalmaq yeriylə təmin edəcəyik. Hətta divizion komandalarında legionerlər üçün tələb olunan bəlli rüsumu da özü ödəyib. Onun məqsədi sırf oynamaq, peşəkarlaşmaq və daha yaxşı klublara keçməkdi. Qapıçı kimi performansı istər baş məşqçimizin, istərsə də mənim xoşuma gəldi. Yaya kimi sıralarımıza qatdıq".

ABDULLA İSMAYILOĞLU