Füri – Usik döyüşü ilə bağlı danışıqlar dalana dirənib - TƏHLİL
İndi bütün boks və qaydasız döyüş həvəskarları böyük bir hadisənin həyəcanını yaşayır.
"Football-plus.az" xəbər verir ki, WBA, IBF və WBO versiyaları üzrə superağır çəkinin çempionu Aleksandr Usik WBC çempionu Tayson Füri ilə üz-üzə gəlməlidi ki, dünya ağır çəkinin kralının kim olduğunu bilsin. “Daily Star”ın martın 12-də yaydığı xəbər əslində bütün azarkeşləri çox ümidləndirmişdi. Nüfuzlu nəşr tərəflər arasındakı danışıqların final mərhələsinə qədəm qoyduğunu, birləşdirici döyüşün aprelin 29-da Londondakı məşhur “Uembli” stadionunda keçiriləcəyini bildirmişdi. Bir daha xatırladaq ki, danışıqlarda sual doğuran əsas məqamlar mükafat fondunun necə bölüşdürüləcəyi və müqavilə şərtlərində əvəzçıxma döyüşünün mümkün olub-olmayacağı ilə bağlıdı.
Təəssüf ki, son günlər bu döyüş ətrafında vəziyyət dəyişib. Daha doğrusu, hər iki düşərgənin qarşılıqlı ittihamları azarkeşlərin birləşdirici döyüşə həsrət qalacağından xəbər verir. Biz bu mövzuda açıqlamaları nəzərinə çatdırmağa qərar verdik ki, özünüz sətirlər altında yatan həqiqəti müəyyənləşdirə biləsiz. Amma o da dəqiqdi ki, bu məsələdə son nöqtə qoyulmayıb, hər an yekun və həlledici qərar verilə bilər.
Əvvəlcə britaniyalının sosial şəbəkədə ukraynalı rəqibinə ünvanladığı videomüraciətin məzmununa nəzər salaq:
“Mən bu gün hüquqşünaslarla danışdım, Usikin adamları müqaviləyə əvəzçıxma döyüşünün təşkili ilə bağlı bəndin salınmasında israrlıdı. Usik, heç birimiz üçün əvəzçıxma şansının olmamasıyla bağlı bəndə necə baxırsan? Gəl yeni səviyyəyə keçək və gələcəkdə nələrin olacağı, məğlubiyyətdən sonra neçə dollar alacağın ilə bağlı narahatlıq keçirməyək. Döyüşdən narahat olun. Aprelin 29-u, revanş şansı olmadan. Qalib şöhrət qazanır, məğlub isə cinsiyyət orqanı əlində evə yollanır. Necədi sənin üçün? Razılaş, ...”
Usik də Füriyə videomüraciət formatında cavab verdi:
“Yekəqarın, revanşla bağlı bəndin üzərində sənin tərəfin israr edir, mənim tərəfim yox. Şarlatan dovşan, kişi ol. Müqavilə imzala və ya titulu burax. Mən mütləq çempion olmaq istəyirəm, daha sənin axmaq oyunlarına qarışmağı yox”.
Döyüşçülərin ardından onların menecerləri də söz atışmasına qarışıb. Fürinin promouteri Frenk Uorrenin fikirləri:
“Danışıqlar gedir. Bizə, sadəcə, irəli hərəkəti davam etdirmək lazımdı. Və onda, əminəm ki, hər şey alınacaq. Aprelin 29-u döyüşün tarixidi. Hansısa məqamda əmin deyildim ki, Tayson bu döyüşə hazırlaşa bilər. Ancaq o qaydasındadı. Məsələnin mahiyyəti ondan ibarətdi ki, döyüşçülər üz-üzə gəlməyə qərar veriblər və indi biz həmin döyüşü təşkil etməliyik. Hər kəs bu dueli izləmək istəyir”.
Usikin promouteri Aleksandr Krasyuk isə bu mövzuda fərqli danışıb. Onun fikrincə, Füri döyüşdən yayınmaq üçün əsas axtarır:
“Füriyə daha heç bir etibar yoxdu. Bu adam qaçmağa çalışır. Taysonun fanatlarına çox yazığım gəlir. Belə davranış döyüşçü üçün biabırçılıqdı. O qorxur. Biz əvvəlcə mükafat fondunun bərabər bölüşdürülməsinə razılaşmışdıq, ancaq sonra Tayson daha çox pul istədi. Belədə biz mükafat fondunun 60-ın 40-a nisbətində bölüşdürülməsinə də razı olduğumuzu dedik. Bir şərtlə ki, 60 faiz qalibə çatsın. Bu bizim son təklifimiz idi. Mən belə məsələlərdə təcrübəli adamam. Adətən, döyüşmək istəməyən boksçu yerinə yetirilməsi mümkünsüz olan şərtlər irəli sürməyə başlayır ki, döyüş baş tutmasın. Digər tərəfdən, mən nikbinliyi qoruyuram. Bəlkə də Tayson hələ bu döyüşə hazır deyil. Bəlkə də psixoloji və ya fiziki cəhətdən hazır deyil – bilmirəm və əslində bunun bizim üçün əhəmiyyəti də yoxdu. Biz bu döyüşü keçirmək istəyirik. O istəmirsə, məcbur edə bilmərik ki. Burda başqa nə deyəsən?!”
Xatırladaq ki, Usik son döyüşdə Entoni Coşuaya, Füri isə Derek Çisoraya qalib gəlib.
Digər xəbərlər
