Tərlan Əhmədov: "Oyun göstərdi ki, düz yoldayıq"
Misli premyer-liqasında 27-ci turun oyunları keçirilir.
"Football-plus.az" xəbər verir ki, "Neftçi" "Kəpəz"i qəbul edib - 2:2. Matçdan sonra qonaqların çalışdırıcısı Tərlan Əhmədovun mətbuat konfransı keçirilib. Sizi mütəxəssisin fikirləri ilə tanış edirik:
"Maraqlı oyun izlədik. İtkilərə baxmayaraq, komandanı motivasiya etmişdik. Əzəli rəqiblə derbidə yaxşı mübarizə aparıb xal götürmək vacib idi. Komandam gözəl mübarizə apardı. Yaxşı oynadıq. Hesab böyük də ola bilərdi, biz də onlar da qalib gələ bilərdi. İntizamlı oyunumuz məni daha çox sevindirir. İnkişaf edirik. Qalib gələ bilən komanda kimi formalaşırıq. Oyuna görə futbolçularıma təşəkkür edirəm. Çox xallar itirmişik. Öz səhvlərimizdən də, hakim səhvlərindən də. Oyun göstərdi ki, düz yoldayıq və fasilədən sonra problemləri həll edib, komandanı bir balaca da yuxarı qaldıra bilərik. Azarkeşlərə təşəkkür edirəm. Veteran futbolçulara da həmçinin".
- Qazanılmış bir xala görə sizə təbrik edək, yoxsa necə?
- Burada təbrikdən söhbət gedə bilməz. "Neftçi" böyük klubdu, "Kəpəz" də. Amma "Kəpəz" uzun müddətdən sonra premyer-liqaya qayıdıb. Yeddinci aydı burdayıq. "Neftçi"dən xal almaq böyük nəticədi. Çünki yeni formalaşırıq. Heç-heçə ədalətli nəticə idi. Hər iki komandanın şansı var idi. Səfərdə qazanılan bir xal düzgün, uğurlu yolumuzda təkan olacaq.
- Bu gün baş hakim Elçin Məsiyevin lazım olan anlarda müdaxilə etmirdi. Siz də gördüz?
- Hakim səhvlərindən 8 xal itirmişik. Özümüzün də səhvi olub. Nəticəyə təsir edəcək xallardı. Amma geridə qalıb. Əvvəlki oyunlara baxanda bu gün qlobal səhvlər olmadı. Cüzi xətalar həmişə olub. Biz məşçqilər aqressiv davranırıq. Amma hakimlikdən narazı qalacaq epizod yoxdu.
- "Kəpəz"in qarşıda çox ağır görüşləri var. Hədəf nə olacaq?
- Bəli, ağır qrafikdi. Komandanın buna qədər və bu gün göstərdiyi oyun ümid verir ki, premyer-liqada qalaq. Qarşıma qoyulan məqsəd liqada yerimizi qorumaqdı. Çalışıram ki, 6-7-ci yerlərdə olaq.
- Üçüncü dövrədə avrokuboklar uğrunda mübarizə aparan komandaların hərəsindən bir xal almısız. Öz rəqiblərinizə qarşı oyunlarda xal itirmisiz. Bu, nə ilə bağlıdır? Güclülərə qarşı mübarizə aparırsız...
- İki dəfə çox zəif oynamışıq. "Sumqayıt"a evdə, "Turan Tovuz"a səfərdə uduzduğumuz matçlar. Həmin qarşılaşmalarda futbol adına bir şey olmayıb. Bu da təbii haldı. Hər komandada belə dövrlər olur. Biz bunu hiss edə bilərik. "Səbail"ə qarşı göstərdiyimiz oyun məğlubiyyətə layiq deyildi. Rəqib bir dəfə gəldi və qol vurdu. Əsas odu ki, komanda liderlərə qarşı necə oynayırsa, özümüzə uyğun rəqiblərə qarşı da o cür oynasın. Komanda yenidi, formalaşma prosesi gedir. Stabil oyundan söhbət gedə bilməz. Çalışıram ki, 3-4 oyun stabillik, qələbələr olsun. Möcüzə yaradacaq bir şeyim yoxdu. Hədəfim odu ki, "Kəpəz" liqada qalsın. Kimisə büdrətmək haqda düşünmürəm. Hər rəqibə fərqli hazırlıqla gedirəm. Futbolçuları ən çox motivasiya etdiyim oyun bugünkü idi. Səkkiz dəqiqə matç haqda təlimat vermişəm. Digər görüşlərdə isə 20-25 dəqiqə. Çünki futbolçular nə etməli olduqlarını bilirdilər.
- Son 5 oyunda "Kəpəz" yalnız "Sabah"a uduzub. Oyununuza baxanda vitamini, isti suyu olmayan komandaya bənzəmir...
- Bu barədə artıq danışmaq istəmirəm. Özünüz agahsız hər şeydən. Futbolçuların özünün gələcəyi var. Bura gələndə deyirdilər ki, hara gedirsən, orada futbol oynamırlar. Amma futbolçuların oynadığı oyunu görürsüz. Onlara təkliflər var.
- Sizcə hansısa komanda premyer-liqanı tərk etməlidi, yoxsa çempionatda klub sayı artmalıdı?
- İstəyərəm ki, cənub bölgəsindən komandamız olsun, Zaqatalaya böyük futbol qayıtsın, şimaldan da həmçinin. 16 komanda olsun, premyer-liqada klub sayı artsın. Hər rayonumuzda həyata baxış fərqlidi. "Şəmkir" tarixində ilk dəfə ÇL-də mərhələ keçib. Amma bu gün yada salınmır. "Simurq" pley-offda olub, indi yoxdu. "Xəzər Lənkəran", "Bakı" yoxdu. Onları qaytarsaq, hərəsindən 1-2 futbolçu çıxarsaq, kənardan milliləşdirilmiş oyunçu gətirmərik. Hər halda qərarı AFFA İcraiyyə Komitəsi verir. Artırılsa, daha yaxşı olar.
Digər xəbərlər
