Misli premyer-liqasının 26-cı turunda "Şamaxı" "Neftçi"ni qəbul etdi. "Şirlər" əzmkarlıq göstərsə də, sonda qapıçının kobud səhvi üzündən məğlub oldu. Oyunun gedişində meydana sonradan çıxanlardan biri də Qurban Səfərov idi.

"Football-plus.az" olaraq gənc futbolçuyla matç, öz çıxışı və başqa mövzular ilə bağlı söhbət etdik.

- Bu gün yaxşı oynasaz da, sonda bir səhv nəticəsində məğlub olduz.

- Komandamız həqiqətən bu gün yaxşı oynadı. Uşaqlar çox əziyyət çəkdilər, döyüşdülər, qol imkanlarımız da oldu, yararlana bilmədik. Bir ani səhv bizə baha başa gəldi və uduzduq. Bu gün hesabda məğlub olsaq da, oyun planında qalib idik. Sadəcə, bəxtsizlik və şanssızlıq oldu. Futbolda belə hallar da olur. Amma həvəsdən düşmürük, irəli baxmaq lazımdı.

- Zəif komandalarla oyunlarınız alınmır, amma ilk "5-lik"də yer alanlara qarşı daha kreativ, mübariz çıxış edərək onlardan xal qopara bilirsiz. Bu nə ilə bağlıdı?

- Əvvəla onu deyim ki, çempionatda zəif komanda yoxdu. Hər bir rəqibə hörmətlə yanaşırıq. Oyunların hamısı çətin keçib. Sadəcə, "Qarabağ", "Sabah", "Zirə", "Neftçi" kimi komandalara qarşı daha motivasiyalı oluruq. İstənilən rəqiblə oyunda meydanda xarakter göstəririk.

- Öz çıxışın haqda nə deyə bilərsən?

- Hələ ki istədiyim formada deyiləm. Amma üzərimdə çalışıram. Əvvəlkindən də yaxşı formada olmağı hədəfləyirəm.

- Mövsümün əvvəlində səni tez-tez start heyətində görürdük. Bir müddət şans qazanmadın. Son oyunlarda isə əvəzetmədən meydana çıxırsan. Bu sırf formada olmamağınla bağlıdı, yoxsa başqa səbəb var?

- Birbaşa formada olmamağımla bağlıdı. Start heyətində və ya əvəzləmədən meydana çıxmaq məşqçilərimizin qərarıdı. Buna da hörmət edirəm. Amma dediyim kimi, əsas yaxşı formaya düşməkdi ki, bunun üçün çox çalışıram.

- Premyer-liqanın sonuncusu diviziona yuvarlanacaq. Bu qərar sizi qorxudur, yoxsa əlavə motivasiya verir?

- Onsuz da hər oyuna sonuncu matç kimi çıxır və hakimin final fitinə kimi döyüşürük. Qorxacaq bir hal yoxdu, əksinə, daha əzmlə mübarizə aparacağıq. İnanıram ki, mübarizəmiz, oyunumuz ilə sonuncu yeri tutmayacağıq.

ABDULLA İSMAYILOĞLU